ಭೂರಿಬೋಜನ - ಭಾಗ 2

ಭೂರಿಬೋಜನ - ಭಾಗ 2
******************
ಎಲೆಯನ್ನು ತೊಳೆದು ನೀ ಕುಳಿತುಕೋ ಸುಮ್ಮನೇ 
ಎಲ್ಲ ಬಗೆಯನ್ನೊಮ್ಮೆ ಬಡಿಸಿ ಬಿಡಲಿ ||
ಕೊನೆ ಎಲೆವರೆಗನ್ನ ತಲುಪಿದಾ ನಂತರವೆ
ದೇವನಾ ನೆನೆದೂಟ ಶುರುವಾಗಲಿ || 1 ||

ಮೊದಲಾಗಿ ಪಾಯಸದ ಸಿಹಿಯುಣ್ಣಬೇಕಂತೆ
ತೋವೆ-ಅನ್ನದ್ದು ಒಂದು ತುತ್ತಂತೆ ||
ಖಾರ ಸಾರಿನ ಜೊತೆಗೆ ತುಪ್ಪ ಹಪ್ಪಳವಂತೆ
ಅದು ಊಟದ ರೀತಿ ಎಲ್ಲ ಬಲ್ಲಂತೆ || 2 ||

ಸಾಂಬಾರು ರುಚಿಯನ್ನು ನೀ ನೋಡಿ ಬಿಡಬೇಕು
ಕಾಯ್ರಸವ ಬೆರಳಲ್ಲಿ ನೆಕ್ಕಿದರು ಸಾಕು ||
ಮಜ್ಜಿಗೆಯ ಹುಳಿಯನ್ನು ಯಾಕೆ ನೀ ಬಿಡಬೇಕು ?
ಪಲ್ಯ ಕೋಸಂಬರಿಯ ತಿಂದುಬಿಡಬೇಕು || 3 ||

ಹೋಳಿಗೆಯ ಸಮಯಕ್ಕೆ ಸಿದ್ಧರಾಗಿರಬೇಕು
ಕಾಯಿ ಹಾಲಿನ ಜೊತೆಗೆ ಮೆಲ್ಲಬೇಕು ||
ಹಣ್ಣ ಪಾಯಸವನ್ನು ಪೋಡಿ ಜೊತೆ ತಿನಬೇಕು
ಚಿತ್ರನ್ನ, ಸಿಹಿಯನ್ನು ನೋಡಿ ಉಣಬೇಕು || 4 ||

ನಿನಗೆ ಬೇಕಾದಷ್ಟು ಕೇಳಿ ನೀ ಹಾಕಿಸಿಕೋ 
ಊಟವನು ಬಲ್ಲವಗೆ ರೋಗವಿಲ್ಲ ||
ಉಣ್ಣುವಾ ಅನ್ನವದು ಆ ದೇವನಾ ಕರುಣೆ
ಹಾಳು ಮಾಡುವುದೆಂದು ಯೋಗ್ಯವಲ್ಲ || 5 ||

ಮಜ್ಜಿಗೆಯ ಜೊತೆಯಲ್ಲಿ ಮಿಡಿ ಉಪ್ಪಿನಾಕಾಯಿ
ಅಹಾ ಎಂಥಾ ಊಟ ಬಿಟ್ಟರುಂಟೆ ? || 
ಇಂಥ ಊಟವನುಣಲು ಪುಣ್ಯಮಾಡಿರಬೇಕು
ನನ್ನ ಊಟದ ಕವನ ಚಂದವುಂಟೆ ? || 6 ||

- ಸುರೇಖಾ ಭೀಮಗುಳಿ
09/06/2015

ಛಾಯಾಚಿತ್ರ : ಸುಮಂತ ಭೀಮಗುಳಿ