"ಭೂರಿಭೋಜನ" - ಭಾಗ 2

ಪ್ರಾಸವಿಲ್ಲದ ಪದ್ಯ ನಿಂತುಣುವ ಊಟದೊಲು 
ತ್ರಾಸದಾಯಕ ಮನಕೆ ರುಚಿಸಲಿಲ್ಲ ||
ಛ೦ದಸ್ಸಿನೆಲೆಗಳೆಡೆ ವಿಕಸಿಸುವ ಕವನಗಳು
ಮನೆಯೂಟ- ಎಂದಿಗೂ ವರ್ಜ್ಯವಲ್ಲ || 1 ||

ನವ್ಯಕವಿತೆಗಳಲ್ಲಿ ಕ್ರಮವಿಲ್ಲ ಹದವಿಲ್ಲ
ಭಾವ-ಪದ ಸಂಪದಕೆ ಕೊರತೆಯಿಲ್ಲ ||
ರುಚಿಶುಚಿಗಳಿದ್ದರೂ ಬಗೆಬಗೆಗಳಿದ್ದರೂ
ನಿಂತು ಉಣ್ಣುವುದೊಂದು ಊಟವಲ್ಲ || 2 ||

ಶಾಂತಿಯಿಂದುಣಬೇಕು ಮೆಚ್ಚಿಕೊಂಡುಣಬೇಕು
ಭೋಜನಕೆ ಅದರದೇ ಕ್ರಮವು ಉಂಟು ||
ಒಲವಿನಿ೦ ಬಡಿಸುತಿರೆ ನಲಿವಿನಿ೦ ಉಣ್ಣುತಿರೆ
"ಭೂರಿಭೋಜನ"ದ ಮುಂದಾವುದುಂಟು ? || 3 ||

- ಸುರೇಖಾ ಭೀಮಗುಳಿ
09/06/2015

ಛಾಯಾಚಿತ್ರ : ಸುಮಂತ ಭೀಮಗುಳಿ