"ಓ ನನ್ನ ತಾಯೆ ......."

ವಿಶ್ವ ಸಿಂಹಾಸನದಿ ಪವಡಿಸುವ ನಿನ್ನನ್ನು

ಕಣ್ತುಂಬಿಕೊಳಬೇಕು ಎಂಬ ಆಸೆ || 

ನೀನು ಮನ ಮಾಡಿದರೆ ಅಸಾಧ್ಯವೇನಲ್ಲ

ಈ ಜನ್ಮದಲೆ ಅದನು ಕಾಣುವಾಸೆ || 1 ||

ನಿನಗೆ ಬೇಕಾದಂತ ಮಕ್ಕಳನು ಸೃಷ್ಟಿಸುವ 

ಸರ್ವಶಕ್ತಳು ನೀನು ಅರಿತೆ ನಾನು ||

ನಿನ್ನ ಕೀರುತಿಯನ್ನು ಉತ್ತುಂಗಕೇರಿಸುವ

ಸಂತತಿಯ ಸೃಜಿಸಿಬಿಡು ತಾಯೆ ನೀನು || 2 ||

ಪುಣ್ಯಗರ್ಭೆಯು ನೀನು, ನಿನ್ನ ಸಂತತಿ ನಾನು

ಸಾಮಾನ್ಯ ಆತ್ಮಳು ಹೇಗಾದೆನು ? ||

ನನ್ನ ಶಕ್ತಿಯ ಬಗ್ಗೆ ಅರಿವಿಲ್ಲ ನನ್ನಲ್ಲಿ

ಹನುಮಂತನಂತೆಯೇ ನಾನಾದೆನು || 3 ||

ನಿನ್ನ ಪಾದಗಳಲ್ಲಿ ಅರ್ಪಿಸಿಹೆ ನನ್ನನ್ನು

ಎಚ್ಚರಿಸು ಬಾರಮ್ಮ ನನ್ನ ತಾಯೆ ||

ನಿನ್ನ ಸೇವೆಯಲೆನ್ನ ತೊಡಗಿಸಲು ಹೇಳಿಕೊಡು

ತೋರುವೆಯ ನನ್ನಲ್ಲಿ ನಿನ್ನ ಮಾಯೆ || 4 ||

-ಸುರೇಖಾ ಭಟ್, ಭೀಮಗುಳಿ

28/04/2015

ಚಿತ್ರಕೃಪೆ : ಇಂಟರ್ ನೆಟ್