" ಯಾಕೆ ಈ ದ್ವಂದ್ವ ? "

ಮನಸು ಏತಕೆ ಹೀಗೆ ತೂಗಾಡುತಿಹುದಲ್ಲ ?
ದ್ವಂದ್ವ ಕಾಡಿಹುದೇಕೆ ನಿಲುವ ಕಸಿದು ||
ಚಿನಕುರುಳಿಯಂತಿದ್ದ ಹೂಮನಸು ಸಹ ಇಂದು
ಕೈಕಟ್ಟಿ ಕುಳಿತಿಹುದು ಮೂಲೆ ಹಿಡಿದು ||

ಹೊರಜಗಕೆ ಸ್ಪಂದಿಸಲೆ ? ನನಗೇಕೆ ಎನ್ನಲೇ ?
ಇರಲೇನು ಸ್ವಾರ್ಥದಲಿ ನನ್ನಷ್ಟಕೆ ? ||
ನನದಾದ ಮೇಲೇಕೆ ಪರರ ಬಗೆಗಿನ ಚಿಂತೆ ?
ಯಾಕೆನಗೆ ಬೇಕು ಈ ಹೊಣೆಗಾರಿಕೆ ? ||

ಕಣ್ಣಿದ್ದು ಕುರುಡಾಗಿ ಕಿವಿಯಿದ್ದು ಕಿವುಡಾಗಿ
ಮನವಿದ್ದು ಮರುಗದೆಲೆ ಬರಡಾಗಲೆ ? ||
ಸಹಜೀವಿಗಳಿಗೆಲ್ಲ ಸ್ಫೂರ್ತಿತುಂಬುತಲೊಮ್ಮೆ
ಜಗದೊಡನೆ ಸ್ಪಂದಿಸಲು ಅಣಿಯಾಗಲೆ ? ||

- ಸುರೇಖಾ ಭೀಮಗುಳಿ
10/11/2016
ಚಿತ್ರ : ಅಂತರ್ಜಾಲ