" ಬೆಕ್ಕಿನ ಕಥೆ ! " (ನನ್ನ 125 ನೆಯ ಕವನ )

ಮನೆಯ ಸುತ್ತ ತಿರುಗುತಿಹುದು
ಅಬ್ಬೆಪಾರಿ ಬೆಕ್ಕು ||
ಜನರ ಹಂಗು ಇಲ್ಲ ಇದಕೆ
ಮುಖದಲೇನೊ ಸೊಕ್ಕು || ೧ ||

ಅರ್ಧರಾತ್ರಿಯಲ್ಲಿ ಗೋಳು
ಅಳುವು ಇದರ ರೋಗ ||
ನಿದ್ದೆ ಹಾಳು ಮನದಿ ನೋವು
ಕೇಳಿಯದರ ರಾಗ || ೨ ||

ಹಾಲು ಅನ್ನ ಕರಿದ ತಿಂಡಿ
ಸೆಳೆಯದಿದರ ಮನಸು ||
ಹೆಗ್ಗಣ ಇಲಿ ಓತಿಕ್ಯಾತ
ಇದುವೆ ಅದರ ತಿನಿಸು || ೩ ||

ನಮ್ಮ ಮನೆಯ ಬಾಗಿಲಲ್ಲೆ
ಬೆಕ್ಕಬೇಟೆ ತಾಣ ||
ರಕ್ತ-ಮಾಂಸ ಚಲ್ಲಪಿಲ್ಲಿ
ಹಿಂಸೆ ಅದಕೆ ಕಾಣ || ೪ ||

ಹಗಲು ಪೂರ ಸೊಂಪು ನಿದ್ದೆ
ಕಾರ ಕೆಳಗೆ ಗೊರಕೆ ||
ಓಡಿಸಿದರು ಗಮನವಿಲ್ಲ
ಭಯವೆ ಇಲ್ಲವದಕೆ || ೫ ||

ಬೆಕ್ಕನಿಷ್ಟಪಡುವ ಜನರೆ
ಬನ್ನಿ ನಮ್ಮ ಮನೆಗೆ ||
ಕೊಂಡು ಹೋಗಿ ಸಾಕಿಕೊಳ್ಳಿ
ಶರಣು ನಾನು ನಿಮಗೆ || ೬ ||

- ಸುರೇಖಾ ಭೀಮಗುಳಿ
25/11/2016
ಚಿತ್ರ : ಅಂತರ್ಜಾಲ