" ಕವನ ಕಟ್ಟುವುದೊಂದು ಕಲೆ "

ಪ್ರಾಸಹೊಂದಿಸುವುದನು ತ್ರಾಸವೆಂದೆಣಿಸದಿರಿ
ಬಲು ಸೊಗಸು ವ್ಯಾಯಾಮ ನಂಮಿದುಳಿಗೆ  ||
ಜತನದಲಿ ಹೊಸೆಯುವುದೆ ತೃಪ್ತಿಯೀಯುವ ಕೆಲಸ
ಶೋತೃವಿನ ಹಂಗಿಲ್ಲ ನಿಜಗವಿತೆಗೆ || ೧ ||

ಗುರಿಯೆಡೆಗೆ ಪಯಣಿಸುವ ಅನುಭವದಿ ಆಹ್ಲಾದ
ತಲುಪಿದೊಡೆ ಏನುಂಟು ಬರಿಯ ಗಮ್ಯ ||
ಪದಕೆ ಪದವನು ಹೊಸೆದು ಮಾತ್ರೆ ಪ್ರಾಸದಿ ಬೆಸೆದು
ಛಂದಸ್ಸು ಹೊಂದಿಸುವ ಕೆಲಸ ರಮ್ಯ || ೨ ||

ನಸುಬಿರಿದ ಮೊಗ್ಗುಗಳ ಸೂತ್ರದೊಲು ಬಂಧಿಸಲು
ಶೃಂಗಾರಗೊಳ್ಳುವುದು ಕುಸುಮ ಹಾರ ||
ಮನದಲರಳಿದ ಭಾವ ಕ್ರಮದಲ್ಲಿ ಹೊಂದಿಸಲು
ಸೃಷ್ಟಿಗೊಳ್ಳುವುದಲ್ಲಿ ಕಾವ್ಯ ಸಾರ || 

ಮನಸು ಇದ್ದರೆ ಸಾಕು ಕೊಂಚ ಪರಿಶ್ರಮ ಬೇಕು
ಕ್ರಮ ಬಿಡದೆ ಮುನ್ನೆಡೆವ ದೃಢತೆ ಬೇಕು || 
ಕವಿ ಬರೆದ ಕವನವನು ಓದುಗನು ಗುನುಗುನಿಸೆ
ಸಾರ್ಥಕ್ಯವೆನ್ನಿಪುದು ಕವಿಯ ಬದುಕು || ೩ ||

- ಸುರೇಖಾ ಭೀಮಗುಳಿ
17/10/2016
ಚಿತ್ರ ಕೃಪೆ : ಅಂತರ್ಜಾಲ