" ಕೋಳಿ ಕಥೆ ! " (ನನ್ನ 126 ನೆಯ ಕವನ)

ಕೋಳಿ ಕೂಗಿದ ಶಬ್ದ ಕೇಳಿಯೆ
ಹಲವು ವರ್ಷಗಳಾಯಿತು ||
ಯಾರದೋ ಮನೆ ಮೇಲೆ ಕುಳಿತಿಹ
ಹುಂಜ ನೆನಪಿಗೆ ಬಂದಿತು || ೧ ||

ಸೂರ್ಯ ಉದಯದ ಮೊದಲ ಕ್ಷಣಕೇ
ಕೂಗುತಿತ್ತದು ಕೋಳಿಯು ||
ಮನೆಯ ಮಂದಿಯು ಏಳುತಿದ್ದರು
ಸಾಂಗ ನಿತ್ಯದ ವಾರ್ತೆಯು || ೨ ||

ಕೋಳಿ ಬೇಡವು ನಮ್ಮ ಜನರಿಗೆ
ಮೊಟ್ಟೆ ಬೇಕಿದೆ ಅನುದಿನ ||
ಹೊಟ್ಟೆ ತುಂಬಿದ ಸುಖದಿ ಮೆರೆಯುತ
ಕೋಳಿ ಮರೆವರು ಈ ಜನ || ೩ ||

ಒಂದು ಸ್ವಲ್ಪವೆ ಅನ್ನ ಸಿಕ್ಕರು
ಕೋಳಿ ಬಳಗವ ಕರೆವುದು ||
ಸಿರಿಯು ಬಂದರೆ ಮನುಜ ಕುಲವದು
ಮನೆಯ ಮಂದಿಯ ಮರೆವುದು || ೪ ||

- ಸುರೇಖಾ ಭೀಮಗುಳಿ
26/11/2016
ಚಿತ್ರ : ಅಂತರ್ಜಾಲ