" ನಾಯಿ ಚಿಂತೆ " (ನನ್ನ 124 ನೆಯ ಕವನ)

ನಮ್ಮ ಎದುರು ಮನೆಯಲಿಹವು
ಎರಡು ಸಾಕು ನಾಯಿ ||
ಮೂರು ಹೊತ್ತು ಬೊಗಳುತಾವೆ
ಮುಚ್ಚದೇನೆ ಬಾಯಿ || ೧ ||

ರಸ್ತೆಯಲ್ಲಿ ಕಾಗೆ-ದನವು
ಬಂದರಿವಕೆ ರಗಳೆ ||
ಯಾರು ಸ್ವಲ್ಪ ಕೆಮ್ಮಿದ್ರೂನು
ಶುರುವೆ ನಾಯಿ ಕಹಳೆ || ೨ ||

ಇವುಗಳ್ಹೀಗೆ ಕೂಗುತಿರಲು
ಮನೆಯ ಅಮ್ಮ ಒಳಗೆ ||
ಟೀವಿ  ಬಿಟ್ಟು ಕದವ ತೆರೆದು
ಬರರು ಎಂದು ಹೊರಗೆ || ೩ ||

ಎದುರು-ಬದರು ಮನೆಯು ನಮದು
ಬಿಡುಗಡೆಯೇ ಇಲ್ಲ ||
ಫೋನು-ಧ್ಯಾನ-ಮನದ ಮಾತು
ಸಾಂಗವಾಗುತಿಲ್ಲ || ೪ ||

ಎಲ್ಲರದ್ದು ಸ್ವಂತ ಸೂರು
ಬದುಕ ಬೇಕು ಸಹಿಸಿ ||
ಬಿಡುಗಡೆಯಾ ದಾರಿ ಏನು ?
ಕರುಣೆ ತೋರಿ ತಿಳಿಸಿ || ೫ ||

- ಸುರೇಖಾ ಭೀಮಗುಳಿ
24/11/2016
ಚಿತ್ರ : ಅಂತರ್ಜಾಲ