ತವರಲ್ಲೆ ಉಳಿದಿರುವ ಓ ನನ್ನ ಮನದನ್ನೆ

"

ತವರಲ್ಲೆ ಉಳಿದಿರುವ ಓ ನನ್ನ ಮನದನ್ನೆ "
*********************************
ತವರಲ್ಲೆ ಉಳಿದಿರುವ ಓ ನನ್ನ ಮನದನ್ನೆ
ನನ್ನ ಮಾತನ್ನೊಮ್ಮೆ ನೀನು ಕೇಳೆ..... || ಪಲ್ಲವಿ ||
ಒಂಟಿಯಾಗಿಹ ನನ್ನ ಸಂಕಟದ ಭಾವಕ್ಕೆ
ಒಂದು ಪದದುತ್ತರವ ನೀನೆ ಹೇಳೆ || ಅನು ಪಲ್ಲವಿ ||

ಹಿರಿಯರೊತ್ತಾಯದಲಿ ನೀನು ತವರಲ್ಲುಳಿದೆ
ನಮ್ಮ ಮನೆ ನನ್ನನ್ನು ಕರೆದೆಳೆಯಿತು ||
ಹೆಚ್ಚು ದಿನ ಉಳಿದರೇ ನನ ಗೌರವಕೆ ಕುಂದು
ಎಂದು ನನ ಒಳಮನಸು ಎಚ್ಚರಿಸಿತು || ೧ ||

ನಗುವಿಲ್ಲ ಮುನಿಸಿಲ್ಲ ಕೈಬಳೆಯ ದನಿಯಿಲ್ಲ
ಜೀವ ತುಂಬುವರಿಲ್ಲ ನನಕವನಕೆ ||
ನೀನು ಇಲ್ಲದ ಮನೆಯ ಮನೆಯೆಂದು ಹೇಳುವರೆ ?
ಜೀವ ಚೈತನ್ಯವೇ ಇಲ್ಲವಿದಕೆ || ೨ ||

ಒಲೆ ಮೇಲೆ ಹಾಲಿಟ್ಟು ಬೇರೆ ಕೆಲಸಕೆ ಹೋದೆ
ಹಾಲು ಬತ್ತಿದ ಬಗ್ಗೆ ಗಮನವಿಲ್ಲ ||
ನನ್ನಡುಗೆಗಳಿಗೆಲ್ಲ ಯಾಕೊ ರುಚಿಯೇ ಇಲ್ಲ
ಗಂಜಿಯುಣ್ಣದೆ ಬೇರೆ ಮಾರ್ಗವಿಲ್ಲ || ೩ || 

ಮುನಿಸ ತೋರುವ ಮುನ್ನ ನೀನಾಗೆ ಬಂದುಬಿಡು
ಬಾರದಿದ್ದರೆ ನೋಡು ನಿನಗೆ ನಷ್ಟ ||
ನೀ ಬೇಗ ಬಾರದಿರೆ ಅಮ್ಮ ಬರುತಾಳಂತೆ !
ಅವಳಡುಗೆ ರುಚಿಯೂನು ನನಗೆ ಇಷ್ಟ || ೪ ||

- ಸುರೇಖಾ ಭೀಮಗುಳಿ
26/10/2015
ಚಿತ್ರ : ಅಂತರ್ಜಾಲ

ನನ್ನ " ಭಾವ ಭಿತ್ತಿ " ಪುಟಕ್ಕೆ ಸ್ವಾಗತ...... https://www.facebook.com/surekha.bheemaguli