" ಭಾವ ಭಿತ್ತಿಯ ಆಶಯ "

" ಭಾವ ಭಿತ್ತಿಯ ಆಶಯ "
*********************
ಶಾರದಾಂಬೆಯ ಕೃಪೆಯು ಎಂದೆಂದು ನಮಗಿರಲಿ
ಮನದ ಸ್ವಾಸ್ಥ್ಯವನೆಂದು ಕಾಯುವುದಕೆ ||
ಮನದ ಮಾತುಗಳೆಲ್ಲ ಮೃದುವಾಗಿ ಹೊರಬರಲಿ
ಭಾವ ಭಿತ್ತಿಗೆ ಮೆರುಗು ತುಂಬುವುದಕೆ || 1 ||

ಲಕ್ಷ್ಮಿದೇವಿಯ ಕರುಣೆ ನಮ್ಮ ಜೊತೆಯಲ್ಲಿರಲಿ
ಮನದಲ್ಲಿ ಸ್ಥೈರ್ಯವನು ಹೊಂದುವುದಕೆ ||
ಹಣವೊ ಆಭರಣವೋ ಸಮಯಕ್ಕೆ ಒದಗಲೀ
ಸಂಕಟದ ಕಡುಕಷ್ಟ ನೀಗುವುದಕೆ || 2 ||

ದುರ್ಗಮಾತೆಯ ದಯೆಯು ನಮ್ಮ ಪೊರೆಯುತ್ತಿರಲಿ
ಬರುವ ಬವಣೆಯನೆಲ್ಲ ತರಿಯುವುದಕೆ ||
ನಷ್ಟದಲಿ ನಲುಗದೇ ಕಷ್ಟದಲಿ ಕರುಬದೇ
ಸಡ್ಡು ಹೊಡೆಯುವ ಧೈರ್ಯ ಹೊಂದುವುದಕೆ || 3 ||

ಅನ್ನಪೂರ್ಣೆಯ ಮಮತೆ ನಮ್ಮ ಕಾಯುತ್ತಿರಲಿ
ಇಚ್ಚಿಸಿದ ಭಕ್ಷ್ಯಗಳ ಮೆಲ್ಲುವುದಕೆ ||
ಜಠರದಲ್ಲಿಹ ಅಗ್ನಿ ಉಪಶಮನಗೊಳುತಿರಲಿ
ಶಕ್ತಿ ರೂಪದಿ ನಮ್ಮ ಪೊರೆಯುವುದಕೆ || 4 ||

- ಸುರೇಖಾ ಭೀಮಗುಳಿ
19/10/2015