" ಜಾತ್ರೆಯ ನೆಪದಲ್ಲಿ ..."

ತುಂಬು ಗಲ್ಲದ ಹುಡುಗ ಹೇಳುವೆನು ನನ್ನೊಳಗ
ತುಂಬಿರುವುದೆನ್ನೊಳಗೆ ನಿನ್ನ ಬಿಂಬ || ಪಲ್ಲವಿ ||
ನಂಬಿರುವ ಮನದನ್ನೆ ಹೇಳುವುದ ನೀ ಕೇಳು
ಸಂಭ್ರಮದಿ ಬದುಕೋಣ ಬಿಟ್ಟು ಜಂಭ || ಅನುಪಲ್ಲವಿ ||

ನಮ್ಮೂರ ಜಾತ್ರೆಯಲಿ ತಿರುಗೋಣ ಬಾರೊಮ್ಮೆ
ಸುಮ್ಮನೆಯೆ ಕೈ ಹಿಡಿದು ಸಡಗರದಲಿ ||
ಘಮ್ಮೆನುವ ಮಲ್ಲಿಗೆಯ ನೀನು ಮುಡಿಸಿದರಾಗ
ಜುಮ್ಮೆನುವುದೆನ್ನ ಮನ ಸಂತಸದಲಿ || ೧ ||

ಬಾನಿನೆತ್ತರವಿರುವ ಚಕ್ರ ತೊಟ್ಟಿಲಿನಲ್ಲಿ
ನಾ ನಿನ್ನ ಜೊತೆಯಲ್ಲಿ ಕೂರುವಾಸೆ ||
ಕಾಣುತಿರೆ ಪಾತಾಳ ಭಯಗೊಂಡು ಬೆದರುತ್ತ
ಕಣ್ಮುಚ್ಚಿ ನಿನ್ನ ತೋಳ್ತಬ್ಬುವಾಸೆ || ೨ ||

ಸುತ್ತ ಜಾತ್ರೆಯ ಗೌಜಿ - ಬೀದಿಯಂಗಡಿ ಸಾಲು
ಹತ್ತು ಮೇಲೆರಡು ಬಳೆ ಕೊಡಿಸಬೇಕು ||
ಮುತ್ತುಸರ ಕೇಳಿದೊಡೆ ನೀಕಣ್ಣು ಮಿಟುಕಿಸುತ
ಮತ್ತೆ ಮನೆಯಲಿ ಕೊಡುವೆನೆನ್ನಬೇಕು || ೩ ||

- ಸುರೇಖಾ ಭೀಮಗುಳಿ
14/11/2017
ಚಿತ್ರ : ಜಾನು ಶೆಟ್ಟಿ ಎಸ್
ತಿದ್ದುಪಡಿ ಮಾರ್ಗದರ್ಶನ : Vishwanath Kukian K ಸರ್