"ನನ್ನೊಳಗಿನ ಕಾವ್ಯಕನ್ನಿಕೆ"

ನನ್ನ ಕನ್ನಿಕೆಗೀಗ ವಯಸು ಇಪ್ಪತ್ತೊಂದು
ಕನ್ನೆಯವಳಿಗೆ ಬರಿದೆ ಹಗಲುಗನಸು ||
ಚೆನ್ನ ಕವನವ ಬರೆಯಲೆನ್ನ ಕಾಡುತ್ತಿಹಳು
ಮೊನ್ನೆಯಿಂದಲು ಲೀನವೆನ್ನ ಮನಸು || ೧ ||

ಕಟ್ಟಿ ಕೊಟ್ಟಿಹಳೆನಗೆ ತನ್ನ ಕನಸನ್ನೆಲ್ಲ
ಬೆಟ್ಟದಷ್ಟಿಹುದವಳ ನಿಯಮಾವಳಿ ||
ದೃಷ್ಟಿ ತೆಗೆಯುತ್ತವಳ ಹೊಸ ಕವನ ಹೊಸೆದಿರಲು
ಸೃಷ್ಟಿಗೊಂಡಿಹುದಿಲ್ಲಿ ದೀಪಾವಳಿ || ೨ ||

ಮೊದಲು-ಕೊನೆಯಲಿ ಪ್ರಾಸ ಕೂಡಿ ಬರಲೇ ಬೇಕು
ಮಧುರ ಪ್ರೇಮವು ಉಕ್ಕಿ ಹರಿಯಬೇಕು ||
ಬದುಕು ಭಾವವು ಬೇಕು ಮೋಹದುಸಿರೂ ಬೇಕು
ಕದ ತೆರೆದು ಕನಸಿನೊಳ ಜಾರಬೇಕು || ೩ ||

ಮೊಗೆಮೊಗೆದು ಕನಸುಗಳ ಹಿಡಿದಿಡುವ ಸಂಭ್ರಮದಿ
ಮೊಗವರಳುತಿದೆಯಲ್ಲ ಯಾಕೆ ಹೀಗೆ ? ||
ಸೊಗಸು ಕವನವು ಮೂಡೆ ಚಿಗುರುತಿಹುದನುಮಾನ
ಮಗಳರಳುತಿಹಳೇನು ನನ್ನ ಒಳಗೆ ? || ೪ ||

- ಸುರೇಖಾ ಭೀಮಗುಳಿ
17/11/2017
ಚಿತ್ರ : ಅಂತರ್ಜಾಲ
ಸಹಕಾರ : ಮೋಹಿನಿ ದಾಮ್ಲೆ