" ಕಾಡುತಿಹ ಕನಸು "

ಹೊಚ್ಚಹೊಸ ಪರಿಸರದಿ ತಂಪು ಸಂಜೆಯ ಸಮಯ
ಬಿಚ್ಚಿಡುವೆ ನಿನ್ನೆದುರು ನನ್ನ ಕನಸು || ಪಲ್ಲವಿ ||
ಮೆಚ್ಚಿ ಬೆಸಗೊಂಡಿರುವ ಮಧುರ ಸಂಬಂಧವಿದು
ಹುಚ್ಚೆದ್ದು ಕುಣಿದಿರುವುದೆನ್ನ ಮನಸು || ಅನುಪಲ್ಲವಿ ||

ಸದ್ದು ಮಾಡದೆಯೆದ್ದು ತಲೆಗೆ ಸ್ನಾನವ ಮಾಡಿ
ಎದ್ದೇಳಿ ಬೆಳಗಾಯಿತೆನ್ನಬೇಕು ||
ಮುದ್ದು ಮಾಡುತ ನೀನು ನನ್ನನೆಬ್ಬಿಸುವಾಗ
ನಿದ್ದೆ ಮಾಡಿದ ತೆರದಿ ನಟಿಸಬೇಕು || ೧ ||

ನಸುಮುನಿಸು ತೋರುತಲಿ ನೀನೆದ್ದು ಹೊರಟಾಗ
ಮುಸುಕು ಸರಿಸುತ ನಿನ್ನನೆಳೆಯಬೇಕು ||
ಹುಸಿಕೋಪದಲಿ ನೀನು 'ಸಾಕುಬಿಡಿ'ರೆನ್ನುತ್ತ
ಕೊಸರಾಡಿ ನನ್ನೊಳೊಂದಾಗಬೇಕು || ೨ ||

- ಸುರೇಖಾ ಭೀಮಗುಳಿ
03/11/2017
ಚಿತ್ರಮೂಲ : ಅಂತರ್ಜಾಲ
ತಿದ್ದುಪಡಿ ಮಾರ್ಗದರ್ಶನ : ವಿಶ್ವನಾಥ್ ಸರ್