" ಮೂರು ತುಂಡಿನ ದಿರಿಸು "

ನನ್ನ ಮಗಳಿಗೆಯಿನ್ನು ಸಧ್ಯದಲ್ಲಿಯೆ ಮದುವೆ
ಮುನ್ನವುಳಿದಿಹ ಕೆಲಸ ಸಾಕಷ್ಟಿದೆ ||
ಚಿನ್ನ ಮಾಡಿಸಬೇಕು ಜವಳಿ ಕೊಳ್ಳಲುಬೇಕು
ನನ್ನ ಸಂಭ್ರಮ ನಿಮಗೆ ಗೊತ್ತೇಯಿದೆ ||

ಮೂರು ತುಂಡಿನ ದಿರಿಸು ಸ್ಯಾಟಿನ್ನು ಬಟ್ಟೆಯದು
ಮಾರುಕಟ್ಟೆಗೆ ಬಂದ ರಾತ್ರಿಯುಡುಪು ||
ಜಾರು ಬಟ್ಟೆಯ ಅಂದ ಆಹಾಹವೇನ್ಚಂದ
ತೋರಿಸಿದೆ ಮಗಳಿಂಗೆ ವಸ್ತ್ರದೊನಪು ||

ಬೆಲೆಯಿದ್ದರೇನಂತೆ ಕೊಳ್ಳೋಣ ನಿನಗೊಂದು
ಚಲುವೆ- ಮದುವೆಯ ರಾತ್ರಿ ಧರಿಸು ನೀನು ||
ಮೆಲುನುಡಿದು ಕೊಡಿಸಿದೆನು ಮಗಳ ಖುಷಿಪಡಿಸಿದೆನು
ಸಲುಗೆಯಲ್ಲವಳ ಭುಜ ತಬ್ಬಿ ನಾನು ||

ಮುದದಿ ಧಿರಿಸನು ನೋಡಿ ಪಿಸುನುಡಿದಳೋ ಗೆಳತಿ
’ಮೊದಲ ರಾತ್ರಿಗೆ ಧಿರಿಸದೇನಕಂತೆ ?’ ||
ಬದಲಾದ ಕಾಲದಿಹ ಹೆಣ್ಣು ಮಕ್ಕಳ ಮಾತು
ಕದಪು ಕೆಂಪೇರಿಹುದು ಮನಸು ಸಂತೆ ||

- ಸುರೇಖಾ ಭೀಮಗುಳಿ
21/11/2017
ಚಿತ್ರ : ಅಂತರ್ಜಾಲ
ತಿದ್ದುಪಡಿ ಮಾರ್ಗದರ್ಶನ : ವಿಶ್ವನಾಥ್ ಸರ್.

ಹಿನ್ನೆಲೆ : ಕಾರ್ಪೋರೇಷನ್ ಸಮೀಪದ YWCA ಸ್ವಯಂ ಅಡುಗೆ ವಸತಿಗೃಹದಲ್ಲಿದ್ದ ದಿನಗಳವು... ವಯಸ್ಸು ಇಪ್ಪತ್ತು ದಾಟಿತ್ತು. ಆಗಷ್ಟೇ ಮೂರು ತುಂಡಿನ ರಾತ್ರಿಯುಡುಪು ( 3 ಪೀಸ್ ನೈಟಿ) ಮಾರುಕಟ್ಟೆ ಪ್ರವೇಶಿಸಿತ್ತು. ಸಾಧಾರಣ ಚೂಡಿದಾರಗಳು ನೂರಿನ್ನೂರು ರೂಪಾಯಿಗೆ ದೊರೆಯುತ್ತಿದ್ದ ಕಾಲದಲ್ಲಿ ಈ ತ್ರೀಪೀಸ್ ನೈಟಿಯ ಬೆಲೆ ನಾನೂರರ ಮೇಲೆ ! ನಮಗೋ ಅಂತದ್ದೊಂದು ಕೊಳ್ಳುವ ಬಯಕೆ ! ಆಗಲೇ ರೂಂಮೇಟ್ ಒಬ್ಬಳಿಗೆ ಮದುವೆ ನಿಗದಿಯಾಯ್ತು. ಆವಳು ತ್ರೀಪೀಸ್ ನೈಟಿ ಕೊಂಡಳು... ಮತ್ತದನ್ನು ಮೊದಲರಾತ್ರಿ ಧರಿಸುವುದೆಂದು ನಿರ್ಧರಿಸಿದಳು. ಆಗ ಹಾಸ್ಟೆಲ್ ನಲ್ಲಿದ್ದ ಸ್ವಲ್ಪ ಮುಂದುವರೆದವಳಿಂದ ಬಂದ ಮಾತು ’ಮೊದಲ ರಾತ್ರಿಗೆ ನೈಟಿ ಎಂತಕ್ಕೆ ?’.... ಆಗಿನ ಕಾಲಕ್ಕೆ ನಮಗೆ ಅದೊಂದು ಹೊಸ ಕಲ್ಪನೆ ! ನಾವೋ... ನಮ್ಮ ಮುಗ್ಧತೆಯೋ.... ಕೊನೆಗೂ ನನ್ನ ತ್ರೀಪೀಸ್ ನೈಟಿ ಕನಸು ನನಸಾಗಲೇ ಇಲ್ಲ.... ಹ ಹ ಹಾ...