ಓ ಹರೆಯವೇ ನೀನು ಮತ್ತೊಮ್ಮೆ ಸಂಭವಿಸು
ಹಲವು ಕೆಲಸಗಳಿನ್ನು ಇಹವು ಬಾಕಿ ||
ಜವ್ವನದ ದಾರಿಯಲಿ ಅಡ್ಡಾಡಿ ಬರಬೇಕು
ಹಗಲು ಕನಸಿನ ದಿನಕೆ ಲಗ್ಗೆ ಹಾಕಿ || ೧ ||
ಬಾಲ್ಯ ದಿನವದು ಬೇಡ ಏರು ಜವ್ವನ ಬೇಕು
ನಾನೊಮ್ಮೆ ಆ ದಿನಕೆ ಹೋಗಬೇಕು ||
ಲಂಗದಾವಣಿ ಧರಿಸಿ ಮಲ್ಲಿಗೆಯ ಹೂಮುಡಿದು
ಅಂಗಳದಿ ರಂಗೋಲಿ ಹಾಕಬೇಕು || ೨ ||
ಕಾಲೇಜು ದಾರಿಯಲಿ ಗೆಳತಿಯರ ಗುಂಪಿನಲಿ
ಮನಬಿಚ್ಚಿ ಲಘುಹರಟೆ ಕೊಚ್ಚಬೇಕು ||
ಪಾಠದಲಿ ಮುಂದಿದ್ದು ಗುರುಗಳನು ಮೆಚ್ಚಿಸುತ
ಸಹಪಾಠಿಗಳ ಗಮನ ಸೆಳೆಯಬೇಕು || ೩ ||
ರೇಷ್ಮೆ ಸೀರೆಯನುಟ್ಟು ಕೇದಗೆಯ ಘಮ ಹೀರಿ
ಕಾಲ್ಗೆಜ್ಜೆ ಸಪ್ಪಳದಿ ಬೀಗಬೇಕು ||
ಮಳೆಯ ಹನಿಹನಿಯಲ್ಲಿ ನನ್ನ ಧ್ವನಿಯನು ಬೆರೆಸಿ
ಮೆಲುವಾಗಿ ಹಾಡೊಂದ ಹಾಡಬೇಕು || ೪ ||
ಅಡಿಕೆ ಚಪ್ಪರದಲ್ಲಿ ಕಾಲ್ನೀಡಿ ಕುಳಿತೊಮ್ಮೆ
ರಾತ್ರಿ ನಕ್ಷತ್ರಗಳ ಎಣಿಸಬೇಕು ||
ಆಗಸದ ಮೋಡಗಳ ಮಾತನಾಡಿಸುತೊಮ್ಮೆ
ಅಪ್ಪನಳಿಯನ ಕನಸ ಕಾಣಬೇಕು || ೫ ||
- ಸುರೇಖಾ ಭೀಮಗುಳಿ
30/11/2016
ಚಿತ್ರ : ಅಂತರ್ಜಾಲ
