" ಬಾವನ ಭಾವ "

ನನ್ನ ನಾದಿನಿ ಇವಳು ಬಹಳ ಒಳ್ಳೆಯ ಹುಡುಗಿ
ಇವಳ ರೇಗಿಸುವಾಸೆ ಯಾಕೊ ಕಾಣೆ ||
ಕಾಡುವೆನು ಈಕೆಯನು ಲಘು ಹಾಸ್ಯಗೈಯ್ಯುತ್ತ
ನೋಯಿಸುವ ಮನವಿಲ್ಲ ದೇವರಾಣೆ || 1 ||

ಧೈರ್ಯ ಸಾಲುವುದಿಲ್ಲ ಹೆಂಡತಿಯ ರೇಗಿಸಲು
ಉಪವಾಸ ವನವಾಸ ಭಯದ ನೆರಳು ||
ಅಪಾಯಗಳಿನಿತಿಲ್ಲ ನಾದಿನಿಯ ಕಾಡಿದರೆ
ಇವಳು ಅತ್ತೆಯ ಮನೆಯ ಮುದ್ದು ಮಗಳು || 2 ||

ನಾದಿನಿಯ ಹುಸಿಮುನಿಸು ಸಂತಸವ ನೀಡುವುದು
ಕಾರಣವು ಏನೆಂದು ನಾನು ಅರಿಯೆ ||
ತಂಗಿ ಕಣ್ಣಂಚಿನಲಿ ಕಣ್ಣೀರು ತುಳುಕಿದರೆ
ಪತ್ನಿ ತಡೆಯೊಡ್ಡುವಳು ಸಾಕು ದೊರೆಯೆ || 3 ||

ಅತ್ತೆ ಮಾವನಿಗಿವಳು ಅಚ್ಚು ಮೆಚ್ಚಿನ ಮಗಳು
ಮುದ್ದು ತಂಗಿಯು ಇವಳು ನನ್ನೊಡತಿಗೆ  ||
ಮನದಲ್ಲಿ ತುಂಬಿಹುದು ಕಾಳಜಿಯ ಮೃದು ಭಾವ
ಶುಭವನ್ನೆ ಕೋರುವೆನು ನನ್ನ ನಾದಿನಿಗೆ || 4 ||

- ಸುರೇಖಾ ಭೀಮಗುಳಿ
27/06/2016
ಚಿತ್ರ : ಅಂತರ್ಜಾಲ

ನನ್ನ " ಭಾವ ಭಿತ್ತಿ " ಪುಟಕ್ಕೆ ಸ್ವಾಗತ......
https://www.facebook.com/surekha.bheemaguli