" ಇಲ್ಲಿ ಮಳೆಯಾಗಿದೆ ಇಂದು...."

ಗುಡುಗುಡನೆ ಗುಡುಗುಡನೆ ಬಾನು ಗುಡುಗುತ್ತಿಹುದು
ಆರ್ಭಟವು ಕೇಳುತಿದೆ ಬಾನ ಬಯಲಿಂದ ||
ಯಾರೆಲ್ಲರಿಗೆ ಬೇಕು ವರ್ಷ ಕಾಲದ ಸೊಬಗು
ಬನ್ನಿರೈ ನಮ್ಮನೆಗೆ ನಿಮ್ಮ ಊರಿಂದ || ೧ ||

ಪಳಪಳನೆ ಪಳಪಳನೆ ಬೆಳಕೊಂದು ಮಿಂಚುತಿದೆ
ಕಣ್ಣು ಕೋರೈಸಿಹುದು ಬಲು ಸೊಗಸಿನಿಂದ ||
ಯಾರೆಲ್ಲರಿಗೆ ಬೇಕು ವರ್ಷಕಾಲದ ಚಿತ್ರ
ಅರ್ಜಿಯನು ಸಲ್ಲಿಸಿರಿ ನಿಮ್ಮ ಕಡೆಯಿಂದ || ೨ ||

ರಪರಪನೆ ರಪರಪನೆ ಜಲಧಾರೆ ಸುರಿಯುತಿದೆ
ಆಗಸದ ಒಡೆಯನಾ ಹಸ್ತದಿಂದ ||
ಯಾರೆಲ್ಲರಿಗೆ ಬೇಕು ವರ್ಷರಾಯನ ಕರುಣೆ
ನಮಿಸ ಬನ್ನಿರಿ ಹಾಗೆ ಭಕ್ತಿಯಿಂದ || ೩ ||

- ಸುರೇಖಾ ಭೀಮಗುಳಿ
01/06/2016
ಚಿತ್ರ : ಅಂತರ್ಜಾಲ

ನನ್ನ " ಭಾವ ಭಿತ್ತಿ " ಪುಟಕ್ಕೆ ಸ್ವಾಗತ......
https://www.facebook.com/surekha.bheemaguli