" ಕವನಾ ಬೇರೆ ಬೇರೆ ತರಹಾ... "

ಕೆಲವು ಕವಿಗಳ ಕವನ ಕೊಳಗತಪ್ಪಲೆಯಂತೆ
ಮೇಲಿಂದ ಕೆಳವರೆಗೆ ಒಂದೆ ಮಾಟ ||
ಅಂಕುಡೊಂಕುಗಳಿಲ್ಲ ಲಾಲಿತ್ಯವಿನಿತಿಲ್ಲ
ಕೊನೆಯ ಅಕ್ಷರ ಮಾತ್ರ ಒಂದೆ ನೋಟ || ೧ ||

ಇನ್ನು ಕೆಲವರ ಪದ್ಯ ಗದ್ಯಗಳ ಹರಿದಂತೆ
ರಾಗ-ಪ್ರಾಸದ ಇನಿತು ಸ್ಪರ್ಶವಿಲ್ಲ ||
ಏನು ಹೇಳಲು ಇವರು ಹೊರಟಿಹರು ಎಂಬುದನು
ಅರಿಯದೆಲೆ ನಾ ಸೋತು ಹೋದೆನಲ್ಲ || ೨ ||

ಇನ್ನು ಕೆಲವರ ಕವಿತೆ ನಾಲ್ಕಾರು ಪದಕುಸುಮ
ಚುಟುಕು-ಗುಟುಕುಗಳೆಂದು ಇವರ ಸೊಲ್ಲು ||
ಬಾಯ್ವರೆಗೆ ಬಂದದ್ದು ಉದರ ತಲಪುವುದಿಲ್ಲ
ಅಷ್ಟರಲಿ ಆ ಕವನ ಮುಗಿದು ಹೋಯ್ತಲ್ಲ || ೩ ||

ಮತ್ತೆ ಕೆಲವರ ಕಾವ್ಯ ಕಬ್ಬಿಣದ ಕಡಲೆಗಳು
ಅರಗಿಸಲು ಸಾಧ್ಯವೇ ಪಾಮರರಿಗೆ ? ||
ಮಿತಿಯ ಜ್ಞಾನವ ಪಡೆದ ನನ್ನಂಥ ಕವಿ(ಪಿ)ಗಳಿಗೆ
ಮೆದುಳಿಗೆಟಕುವುದಿಲ್ಲ ಇವರ ಗುಳಿಗೆ || ೪ ||

ಕವನವೆಂಬುದು ನಮ್ಮ ಮುದ್ದು ಹೆಣ್ಮಗಳಂತೆ
ಬೇಕೆನಿಸದೇ ಕೊಂಚ ಒನಪು ಒಯ್ಯಾರ ? ||
ಜಡೆಹೆಣೆದು ಹೂಮುಡಿಸಿ ಲಂಗ ದಾವಣಿ ತೊಡಿಸಿ
ದೃಷ್ಟಿ ತೆರೆದರೆ ಆಯ್ತು ಅವಳ ಸಿಂಗಾರ || ೫ ||

- ಸುರೇಖಾ ಭೀಮಗುಳಿ
03/06/2016
ಚಿತ್ರ : ಅಂತರ್ಜಾಲ

ನನ್ನ " ಭಾವ ಭಿತ್ತಿ " ಪುಟಕ್ಕೆ ಸ್ವಾಗತ......
https://www.facebook.com/surekha.bheemaguli