" ಬೆಳಗು ಬಾ ಭಾಸ್ಕರನೆ........"

" ಬೆಳಗು ಬಾ ಭಾಸ್ಕರನೆ........"
*****************************
ಬೆಳಗು ಬಾ ಭಾಸ್ಕರನೆ ಬೆಂಗ್ಳೂರ ಹಗಲನ್ನು
ಕುಳಿತಲ್ಲೆ ಜನರೆಲ್ಲ ತೂಕಡಿಸುತಿಹರು ||
ಎದ್ದೇಳಲೇ ಬೇಕೆ ? ಶಾಲೆಗ್ಹೋಗಲೆ ಬೇಕೆ ?
ಗಂಡ-ಮಕ್ಕಳು ಎಲ್ಲ ಗೊಣಗುತಿಹರು || ೧ ||

ನೀಬರದೆ ಹೋದರೇ ನನಗೇನು ಅನ್ನಿಸದು
ಕಳೆದು ಬಿಡುವುದು ಹಾಗೆ ನನ್ನ ದಿನಚರಿಯು ||
ಹೊತ್ತು ಹೋಗುವುದಿಲ್ಲ- ಕೆಲಸ ಸಾಗುವುದಿಲ್ಲ
ಬಟ್ಟೆ ಒಣಗುವುದಿಲ್ಲ ಅದುವೆ ಸಂಕಟವು || ೨ ||

ಕಾರ್ಯಭಾರದ ಚಿಂತೆ ನನ್ನಲ್ಲಿ ಇನಿತಿಲ್ಲ
ಚಳಿರಾಯನ ಜೊತೆಗೆ ನನ್ನ ಸಖ್ಯ ||
ಮನೆಮಂದಿಯೆಲ್ಲರು ಹಾಗೆ ಕೂರುವುದಕುಂಟೆ ?
ಪರಿಪರಿಯ ಕೆಲಸಗಳು ಇಹವು ಮುಖ್ಯ || ೩ ||

ನಿನಗೆ ಹಬ್ಬದ ರಜೆಯು ಅತಿಯಾಗಿ ಹೋಯಿತು
ವಾರದಿಂದೀಚೆಗೆ ಪತ್ತೆ ಇಲ್ಲ ||
ಇನ್ನು ಬಾರದೆ ಇರಲು ಜನ ನಿನ್ನ ಮರೆಯುವರು
ಮತ್ತೆ ನಿನ್ನನು ಯಾರು ಕರೆಯುವುದೆ ಇಲ್ಲ ! ||

- ಸುರೇಖಾ ಭೀಮಗುಳಿ
18/11/2015
ಚಿತ್ರ : ಸುಮಂತ್ ಭೀಮಗುಳಿ

ನನ್ನ " ಭಾವ ಭಿತ್ತಿ " ಪುಟಕ್ಕೆ ಸ್ವಾಗತ......
https://www.facebook.com/surekha.bheemaguli