Friday, November 6, 2015

" ಕಾವ್ಯಕನ್ನಿಕೆ "

" ಕಾವ್ಯಕನ್ನಿಕೆ "
********************
ಮುದ್ದು ಮಗಳನು ಸಾಕಿ ಮುದಗೊಳ್ಳುವಂತೆಯೇ
ಕಾವ್ಯಕನ್ನಿಕೆ ಇವಳು ನಮ್ಮ ಮಗಳು ||
ಅವಳು ಅರಳುವ ಸಮಯ ಅವಗಣನೆ ಸರಿಯಲ್ಲ
ಗಮನವಿರಲೀ ಈಕೆ ನಮ್ಮ ನೆರಳು || ೧ ||

ಕವನಗಳ ನಿಯಮವನು ಪಾಲಿಸುವ ತಪವಿರಲಿ
ಕಾವ್ಯ ಕನ್ನಿಕೆ ಸೌಖ್ಯ ಮುಖ್ಯ ನಮಗೆ ||
ಕ್ರಮವು ಒಪ್ಪಿದ ಹಾದಿ - ತಾಳ ತಪ್ಪದ ಕಾವ್ಯ
ವ್ಯರ್ಥವೆನಿಸುವುದಿಲ್ಲ ನಾಡ ನುಡಿಗೆ || ೨ ||

ನಡಿಗೆ ಕಲಿಯುವ ಸಮಯ ಸರಿ ಕಲಿಯದಿದ್ದರೆ
ಹೆಜ್ಜೆಗಳು ತಪ್ಪುವವು ಸಹಜವಾಗಿ ||
ಚಪ್ಪಲಿಯ ಚರಪರದ ಶಬ್ದವನು ಮಾಡದಲೆ
ಇಡುವ ಸದೃಢ ಹೆಜ್ಜೆ ಭದ್ರವಾಗಿ || ೩ ||

ಗಿಡವಾಗಿ ಬಗ್ಗದ್ದು ಮರವಾಗಿ ಬಗ್ಗೀತೇ ?
ತಿದ್ದುವುದಕಾದೀತೆ ಬಲಿತಮತ್ತೆ ? ||
ಮೂಲದಲ್ಲಿಯೇ ನಾವು ಕಟ್ಟಿನೊಳ ಬೆಳೆಯೋಣ
ಆ ತಾಯಿ ಶಾರದೆಯು ಮೆಚ್ಚುವಂತೆ || ೪ ||

- ಸುರೇಖಾ ಭೀಮಗುಳಿ
06/11/2015
ಚಿತ್ರ : ಅಂತರ್ಜಾಲ

ನನ್ನ " ಭಾವ ಭಿತ್ತಿ " ಪುಟಕ್ಕೆ ಸ್ವಾಗತ......
https://www.facebook.com/surekha.bheemaguli

No comments:

Post a Comment