" ಮತ್ತೆ ಬಂದ ಸೂರ್ಯ ನಮ್ಮ ಊರಿಗೆ ....."

" ಮತ್ತೆ ಬಂದ ಸೂರ್ಯ ನಮ್ಮ ಊರಿಗೆ ....."
------------------------------------------
ಅಪರೂಪವಾಗಿದ್ದ ಸೂರ್ಯ ರಶ್ಮಿಯ ಸೊಬಗು
ಮತ್ತೊಮ್ಮೆ ಊರನ್ನು ಬೆಳಗಿದೆಯಲ್ಲ ||
ಹದಿನೈದು ದಿನದಿಂದ ರಜೆಹಾಕಿ ಹೋಗಿದ್ದ
ನಮ್ಮ ಸೂರ್ಯನು ಇಂದು ಬಂದಿಹನಲ್ಲ || ೧ ||

ನಿನ್ನೆನಿನ್ನೆಯವರೆಗೂ ಮಳೆಯದೇ ಕಾರ್ಬಾರು
ಇಂದು ಮಳೆಮೋಡಗಳ ಸುಳಿವೆ ಇಲ್ಲ ||
ಆಕಾಶದಂಗಳವು ಶುಭ್ರವಾಗಿದೆಯಲ್ಲ
ಎಲ್ಲಿ ಹೋದವು ಮೋಡ ದೇವಬಲ್ಲ || ೨ ||

ನನ್ನ ಹಲಸಿನ ಮರವು ರವಿಯ ರಶ್ಮಿಯ ಕಂಡು
ಮಿರಮಿರನೆ ಮಿನುಗುತಿದೆ ನೋಡಿರೆಲ್ಲ ||
ಮೇಘನಿಲ್ಲದ ಬಾನ ಆ ಭಾನು ಆಳಿಹನು
ತಂಗಾಳಿ ಬೀಸುತಿದೆ ಸುಖಿಸಿರೆಲ್ಲ || ೩ ||

ಬಾಲ್ಯದಾ ನೆನಪಿನಲಿ ಬೆನ್ನ ಒಡ್ಡಿಸಿ ಕುಳಿತೆ
ಚಳಿಕಾಯಿಸುವ ಆಸೆ ಮನಸಿನಲ್ಲಿ ||
ಕ್ಷಣ ಕಾಲ ಕಳೆಯುತಲೆ ಚರ್ಮ ಚುರುಗುಟ್ಟಿತದೋ
ಸೂರ್ಯ ಮೆರೆಯುತ ನಕ್ಕ ಬಾನಿದಲ್ಲಿ ! || ೪ ||

- ಸುರೇಖಾ ಭೀಮಗುಳಿ
25/11/2015
ಚಿತ್ರ : ನನ್ನ ಹಲಸಿನ ಮರ

ನನ್ನ " ಭಾವ ಭಿತ್ತಿ " ಪುಟಕ್ಕೆ ಸ್ವಾಗತ......
https://www.facebook.com/surekha.bheemaguli