"ಗೋಕುಲದ ದಾರಿಯಲ್ಲಿ"

"ಗೋಕುಲದ ದಾರಿಯಲ್ಲಿ"
********************

ಗೋಕುಲದ ದಾರಿಯಲಿ ಗೋಧೂಳಿ ಸಮಯದಲಿ
ಗೋವು- ಗೆಳೆಯರ ಜೊತೆಗೆ ಕೃಷ್ಣನೊಡನೆ ||
ಗೋವಿಂದನಾ ಕೊಳಲ ನಾದದಲಿ ಮೈಮರೆತು
ಗಾನ ವೈಭವ ಸವಿವ ಸಕಲರೊಡನೆ || 1 ||

ಯಮುನೆಯಾ ತಟದಿಂದ ಬೀಸಿತದೊ ತಂಗಾಳಿ
ಬೆರೆಯುತಿದೆ ಮುರಲಿಯಾ ಇಂಪಿನೊಡನೆ ||
ಮುದ್ದು ಮೊಗದಾ ಹಸುವು "ಅಂಬಾ" ಎನ್ನುತ್ತಲಿದೆ
ಗಾಯನದಿ ಜೊತೆಗೊಡುತ ಕೊಳಲಿನೊಡನೆ || 2 ||

ಚಂಪಕದ ಪರಿಮಳವು ಪಸರಿಸಿದೆ ವನವನ್ನು
ನಾಸಿಕದ ಹೊಳ್ಳೆಗಳು ಅರಳವೇನು ? ||
ಸೂರಗೆಯ ಕಂಪದೋ ತಾ ತೇಲಿ ಬರುತಲಿದೆ
ಮೈಯ ಮರೆಸುವ ಸಂಚು ಇರುವುದೇನು ? || 3 ||

ಸಂಜೆಗತ್ತಲ ಹೊತ್ತು ಬಹುಬೇಗ ಬಂದಿಹುದು
ಯಾಕಿಷ್ಟು ಅವಸರವೋ ನೇಸರನಿಗೆ ? ||
ಅರೆಗಳಿಗೆ ತಾಳಿಕೋ ನಮ್ಮೊಡನೆ ನಲಿದಾಡು
ಗೋಪಾಲನಾ ಸಖ್ಯವಿರುವವರೆಗೆ ! || 4 ||

- ಸುರೇಖಾ ಭೀಮಗುಳಿ
05/09/2015
ಚಿತ್ರಕೃಪೆ : ಅಂತರ್ಜಾಲ