" ಕಂದಗೊಂದು ಬುಟ್ಟಿ "

" ಕಂದಗೊಂದು ಬುಟ್ಟಿ "
******************

ತೊಟ್ಟಿಲಲ್ಲಿ ನಗುವ ಮಗುವ
ಬುಟ್ಟಿಯಲ್ಲಿ ಹಾಕಿಕೊಂಡು
ಒಟ್ಟು ನೂಕಿ ಒಯ್ವರಲ್ಲ
ಕೆಟ್ಟ ಬೇಸರ || 1 ||

ಎತ್ತಿಕೊಳಿರಿ ಎನಲು ಬರದ
ಹೊತ್ತುಕೊಳದೆ ಮುದ್ದು ಮಗುವ
ವಸ್ತುವಂತೆ ಕಾಣ್ವರಲ್ಲ
ಸುಸ್ತು ಸಂಕಟ || 2 ||

ಕಂದಗೊಂದು ಬುಟ್ಟಿಯೇಕೆ ?
ಚಂದವಾಗಿ ಎತ್ತಿಕೊಂಡು
ಮಂದಗಮನವಾದರೂನು
ಅಂದವಲ್ಲವೇ ? || 3 ||

ಎಳವೆಯಲ್ಲಿ ಎತ್ತಬೇಕು
ಬೆಳೆದ ಮಗುವು ಕೇಳ್ವುದೇನು
ಕಳೆದ ಬಾಲ್ಯ ಮತ್ತೆ ಮತ್ತೆ
ಮೊಳೆಯಲಾರದು  || 4 ||

ಪುಟ್ಟ ಮಗು ನಿಮದೆ ಸಿರಿಯು
ಬೆಟ್ಟದಷ್ಟು ಭಾರವಿಲ್ಲ
ಉಟ್ಟಬಟ್ಟೆ ನೆರಿಗೆ ಬಿದ್ದ
ರಷ್ಟು ಚಿಂತೆಯೇ ? || 5 ||

ಕಂದನನ್ನು ಎತ್ತಿಕೊಳಿರಿ
ಹೃದಯ ಹೃದಯ ಬೆಸೆದುಕೊಳಿರಿ
ಇಂದು ಖುಷಿಯು, ನಾಳೆ ಹೇಗೊ
ಮಂದಮತಿಗಳೇ || 6 ||

- ಸುರೇಖಾ ಭೀಮಗುಳಿ
11/09/2015
ಚಿತ್ರಕೃಪೆ : ಅಂತರ್ಜಾಲ