" ಬಾವಲಿಯೊಡನೊಂದು ಸಂವಾದ "

" ಬಾವಲಿಯೊಡನೊಂದು ಸಂವಾದ "
****************************

ಬಾವಲಿಯೊಂದು ಹಲಸಿನ ಮರದಲಿ
ತಲೆಕೆಳಗಾಗಿ ನೇಲಿಹುದು ||
ನಮ್ಮನು ಕಂಡು ಹೆದರಿತೊ ಏನೋ
ಭಯದಲಿ ಕಣ್ ಕಣ್ ಬಿಡುತಿಹುದು || 1 ||

ಹೆದರಿಕೆ ಯಾಕೆ ? ನಾಚಿಕೆ ಬೇಕೆ ?
ಹೇಳುವೆಯೇನು ನಿನ್ನ ಕಥೆ ? ||
ವಿಷಯ ತಿಳಿಯುವ ಆಸೆಯು ನನಗಿದೆ
ಅರಿಕೆ ಮಾಡಿಕೊ ನಿನ್ನ ವ್ಯಥೆ || 2 ||

’ಪುಟ್ಟ ಸಸ್ತನಿ’ ನಿನ್ನದೇ ಬಿರುದು
ಗೊತ್ತೇ ನಿನಗೆ ಬಾವಲಿಯೆ ? ||
ನಿಶಾಚರಿ ಎಂಬ ಕೀರ್ತಿಯು ನಿನಗಿದೆ
ಜೈ ಜೈ ನಿರ್ಭಯ ಸಾಹಸಿಯೆ || 3 ||

ಪಾಳು ಮನೆಗಳು ನಿನ್ನದೇ ಠಾವು
ಎನ್ನುವ ವಿಷಯ ಅರಿತಿರುವೆ ||
ಮಾಡಿನ ಪಕಾಸಿಗೆ ನೇತಾಡುತ್ತ
ಮಗುವನು ಹೇಗೆ ಸುಧಾರಿಸುವೆ ? || 4 ||

- ಸುರೇಖಾ ಭೀಮಗುಳಿ
12/09/2015
ಚಿತ್ರ : ಸುಮಂತ ಭೀಮಗುಳಿ