" ಓ ಕಲಾಂ ... ನಿನಗೆ ಸಲಾಂ..... ರಾಷ್ಟ್ರಪುರುಷನಿಗೊಂದು ನಮನ "

ನೀ ಏರಿದೆತ್ತರವ ಕಂಡು ಬೆರಗಾಗಿಹೆನು
ಸಲ್ಲಿಸುವೆ ನಿನ್ನಲ್ಲಿ ನನ್ನ ನಮನ ||
ಭಾರತಾಂಬೆಯ ಮಡಿಲ ಹೆಮ್ಮೆಯಾ ಪುತ್ರನೇ
ಶ್ರದ್ಧಾಂಜಲಿಯು ನಿನಗೆ ನನ್ನ ಕವನ || 1 ||

ಕನಸ ಕಾಣುವುದನ್ನು ಹೇಳಿಕೊಟ್ಟಿಹೆ ನೀನು
’ವಿಶ್ವಗುರು’ ಕನಸಿಹುದು ನನ್ನ ಮನದೆ ||
ಭಾರತಾಂಬೆಯು ಇನ್ನು ತಲೆಎತ್ತಿ ನಿಲ್ಲುವಳು
ಪೂರ್ವದಲೆ ನೀನೇಕೆ ನಿರ್ಗಮಿಸಿದೆ ?  || 2 ||

ಗುರುವನಾರಾಧಿಸುತ ಗುರು ಸ್ಥಾನಕ್ಕೇರಿದೆ
ಎಲ್ಲರಾ ಪ್ರೀತಿಯನು ನೀ ಗಳಿಸಿದೆ ||
ಪ್ರತಿಭೆಗಳನರಳಿಸುತ ನಮಗೆ ಮಾದರಿಯಾದೆ
ವಿಜ್ಞಾನ ಪತಾಕೆಯನು ಎತ್ತಿ ಹಿಡಿದೆ || 3 ||

ಮುಗ್ದತೆಗೆ ಇನ್ನೊಂದು ಹೆಸರಾಗಿ ಕಾಣಿಸಿದೆ
ಸರಳತೆಗೆ ರೂಪಕವೆ ನೀನಾಗಿ ಹೋದೆ ||
ತಂತ್ರಜ್ಞಾನದ ಜೊತೆಗೆ ಸಂಸಾರವನು ನಡೆಸಿ
ದೇಶದುದ್ಧಾರಕ್ಕೆ ನಿನ್ನನರ್ಪಿಸಿದೆ || 4 ||

ನಿನ್ನ ಪಾಲಿನ ಕೆಲಸ ಚಂದದಲಿ ನೀ ಮಾಡಿ
ಸಾರ್ಥಕ್ಯಗೊಳಿಸಿದೆ ನಿನಜೀವನ ||
ಪುಣ್ಯಗರ್ಭೆಯು ತಾಯಿ ನನ್ನ ಭಾರತಮಾತೆ
ಮತ್ತೊಮ್ಮೆ ಆಗಲೀ ನಿನ್ನ ಜನನ || 5 ||

- ಸುರೇಖಾ ಭಟ್ ಭೀಮಗುಳಿ
28/07/2015
ಚಿತ್ರಕೃಪೆ : ಇಂಟರ್ ನೆಟ್