"ತಿರುವು"

ಪಯಣದಲಿ ತಿರುವುಗಳು ಸಹಜವೋ ಓ ಮನುಜ
ಜಾಗ್ರತೆಯ ಜೊತೆಯಲ್ಲಿ ಮುಂದೆ ಸಾಗು ||
ಸುತ್ತಮುತ್ತಲು ಮಂಜು ಕವಿದು ಕುಳಿತಿಹುದಿಲ್ಲಿ
ದೈವದಾ ಲೀಲೆಯಿದು ತಲೆಯ ಬಾಗು || 1 ||

ಪ್ರಕೃತಿಯ ಸೊಗವನ್ನು ಒಂದುಕ್ಷಣ ಸವಿದುಬಿಡು
ತಡೆಹಾಕು ನಿನ್ನಯಾ ಬಿರು ಓಟಕೆ ||
ಬೇಕು ಎಂದರು ನಾಳೆ ದೊರಕದಿದು ಇನ್ನೊಮ್ಮೆ 
ಉಣಿಸಿಬಿಡು ಹಬ್ಬವನು ನಿನ್ನ ನೋಟಕೆ || 2 ||

ಸಸ್ಯಶ್ಯಾಮಲೆಗಿಂದು ಇಬ್ಬನಿಯ ಮಜ್ಜನಾ
ನೇಸರನ ಕಿರಣಗಳ ಗಂಧ -ಧೂಪ ||
ಮಿಂದು ಮಡಿಯುಟ್ಟು ಶುದ್ಧಳಾದಳು ತಾಯಿ
ತುಂಬಿಕೋ ಮನದಲ್ಲಿ ಅವಳ ರೂಪ || 3 ||

- ಸುರೇಖಾ ಭಟ್ ಭೀಮಗುಳಿ
04/07/2015
ಚಿತ್ರಕೃಪೆ : Vishwas AV - "ನಮ್ ನಗರ" ಗ್ರೂಪ್