ಬಿಡಿಪದ್ಯಗಳು 

"ಮೌನಗೀತೆ"
--------------
ಕರಿಮೋಡ ಮುಸುಕಿರಲು ಬಾನಿನಂಗಳದಲ್ಲಿ
ಮೆರೆಯುತಿದೆ ನನ್ನೊಳಗೆ ಮೌನ ಸುಗ್ಗಿ || 
ಕರೆದು ಮಾತಾಡಲೀ ನೀನೆ ಮೊದಲೆನ್ನುತ್ತ
ಸರಿಯುತಿದೆ ಸಿರಿಸಮಯ ತಗ್ಗಿಬಗ್ಗಿ ||

"ಭಾವರಾಹಿತ್ಯ"
----------------
ಪಿರಿಪಿರಿಯ ದನಿಯಲ್ಲಿ ಮಳೆಹನಿಯು ಹನಿದಿರಲು
ಪರಿಪರಿಯ ಭಾವಗಳೆ ಹೋದಿರೆಲ್ಲಿ ? ||
ಸರಿದೆಲ್ಲಿ ಹೋಗುವಿರಿ ನೀವು ನನ್ನನು ಬಿಟ್ಟು ?
ಕರೆಯುತಿರುವೆನು ನಿಮ್ಮ- ಬನ್ನಿರಿಲ್ಲಿ || 

"ಹೀಗೊಂದು ಆಕಾಶಯಾನ"
-------------------------
ದೂರದಲಿ ತೇಲುತಿಹ ಮೇಘ ಮಾಲೆಯ ಕಂಡು
ಸಾರಿ ಕರೆದಿತ್ತೆನ್ನ ಹಳೆಯ ಕನಸು ||
ಕೋರಿಕೆಯು ಮನ್ನಿಸಿದ ದೇವತೆಯ ಜೊತೆಯಲ್ಲಿ
ಹಾರಾಡಿ ಬಂದೆ ನಾ - ಎಂಥ ಸೊಗಸು ! ||

"ಮೊಗ್ಗು"
----------
ಅರೆಬಿರಿದ ಮೊಗ್ಗೊಂದು ಮೆಲುನಕ್ಕು ನುಡಿಯುತಿದೆ
ಬರೆಯೆ ಮರುಳೇ ನನ್ನ ಮೇಲೊಂದು ಕವನ ||
ಸರಸರನೆ ಬರೆದಿರುವೆ ನಾಲ್ಕಾರು ಸಾಲುಗಳ
ಕಿರಿದು ಸಮಯದಿಯದರ ಮೇಲಿಟ್ಟು ಗಮನ ||

- ಸುರೇಖಾ ಭೀಮಗುಳಿ
14/06/2018
ಚಿತ್ರ ಮೂಲ : ಅಂತರ್ಜಾಲ