ಮಳೆಯೂರಿನಾ ಹುಡುಗಿ
ಹೊಳೆಯ ನೀರಲಿ ನಡುಗಿ
ಬಳಸಿ ನಿಂತಿಹಳವಳು ಬಿಂದಿಗೆಯನು ||
ಎಳೆನಿಂಬೆಯಂತಿಹಳು
ಹೊಳೆವ ಕಿರುಗಣ್ಣವಳು
ಕಳಿಸಿಹಳು ಸೆರೆಹಿಡಿದ ಚಿತ್ರವನ್ನು || ೧ ||
ನೀರು ತಾರಲು ಹೋಗಿ
ಜಾರಿ ಬಿದ್ದಿಹಳಾಗಿ
ಬಾರೆಂದು ಕರೆದಿಹಳು ಕರೆಯ ಮಾಡಿ ||
ತೌರಿನೆಡೆ ಸುಳಿವುದಕೆ
ಬೇರೆ ಕಾರಣ ಬೇಕೆ
ಸಾರಿ ಹೊರಟಿಹೆನು ನಾನೇರಿ ಗಾಡಿ || ೨ ||
ತೌರಿನಲ್ಲರಳುತಿಹ
ಪಾರಿಜಾತದ ಪುಷ್ಪ
ಮಾರುಹೋಗಿನೆನಿವಳ ನಗುವ ನೋಡಿ ||
ದಾರಿಗಡ್ಡವ ಕಟ್ಟಿ
ಮೂರು ಮುತ್ತನ್ನಿಕ್ಕಿ
’ಬಾರತ್ತೆ’ಯೆನ್ನುವಳು ತನ್ನ ಜೋಡಿ || ೩ ||
ಸಣ್ಣ ಪ್ರಾಯದ ಹುಡುಗಿ
ಕಣ್ಣ ಸೆಳೆಯುವ ಬೆಡಗಿ
ಅಣ್ಣನಾ ಮಗಳೀಕೆ ನನ್ನ ಸೊಸೆಯು ||
ತಣ್ಣಗಿಹಳಿವಳೆಂದು
ಬಣ್ಣನೆಯ ಮಾಡಿದರೆ
ಮಿಣ್ಣಗಿಣುಕುವುದೊಂದು ಪುಟ್ಟ ನಗೆಯು || ೪ ||
- ಸುರೇಖಾ ಭೀಮಗುಳಿ
23/11/2017
ಚಿತ್ರ : ಅಂತರ್ಜಾಲ
ತಿದ್ದುಪಡಿ ಮಾರ್ಗದರ್ಶನ : Vishwanath Kukian K ಸರ್
