****************************
ಬಲಭಾಗದಲ್ಲಿಹುದು ಅಟ್ಟ ಹತ್ತುವ ಏಣಿ
ಅದರಾಚೆ ಮೆರೆಯುತಿದೆ ಮುರದ ಒಲೆಯು ||
ಹಸಿಹುಲ್ಲು ಕಡಿಅಕ್ಕಿ ತೌಡನ್ನು ಬೇಯಿಸಲು
ಅದರಿಂದ ಬರುತಿಹುದು ಮುರದ ಘಮಲು || 1 ||
ಹಿಂದೆ ಭತ್ತದ ಪಣಥ ಎಡಕೆ ಹೊರಗಿನ ದ್ವಾರ
ಮುಂಭಾಗದಲ್ಲಿಹುದು ಹಸು ಕೊಟ್ಟಿಗೆ ||
ಅಟ್ಟದೆತ್ತರದಿಂದ ಇಳಿದು ಬಂದಿದೆ ಹಗ್ಗ
ಅದರೆ ಮೇಲಿಟ್ಟಿಹೆವು ಮರದ ಹಲಗೆ || 2 ||
ಜೋಕಾಲಿಯಲಿ ಕುಳಿತು ಜೀಕುವಾ ಮೋಜೇನು
ಸಮಯ ಕಳೆಯಲು ಇರುವ ಏಕದಾರಿ ||
ಬೇಸರಕು, ಸಂತಸಕು, ಕೋಪದುಪಶಮನಕ್ಕು
ಜೋಕಾಲಿ ಸಹಚರ್ಯ ನಮಗೆ ಹೆದ್ದಾರಿ || 3 ||
ಜೀಕಿದಾ ರಭಸಕ್ಕೆ ಹಗ್ಗ ತಪ್ಪಿತು ಮಣೆಯು
ಭೂತಾಯಿ ಜೊತೆಯಲ್ಲಿ ನನ್ನ ಜೋಡು ||
ಕೆಳ ಜಾರಿ ಬಿದ್ದರೂ 'ಅಯ್ಯೋ' ಎನ್ನುವರಿಲ್ಲ
ನನ್ನ ಸಂತೈಸಿಹುದು ಅಟ್ಟದಾ ಮಾಡು || 4 ||
- ಸುರೇಖಾ ಭೀಮಗುಳಿ
30/09/2015
ಚಿತ್ರಕೃಪೆ : ಅಂತರ್ಜಾಲ
