ಊರ ಮನೆಯಂಗಳದಿ ಕೆಸುವಿನೆಲೆ ನಗುತಿರಲು
ತಾರದುಳಿಯಲಿ ನಾನು ಹೇಗೆ ಹೇಳಿ ? ||
ಬೇರೊಂದು ಯೋಚನೆಯೆ ಮಾಡದೆಯೆ ಕೊಯ್ದಿಟ್ಟೆ
ಬಾರದುಳಿವುದೆ ನೆನಪು ಪತ್ರಡೆ-ಹುಳಿ || ೧ ||
ಹತ್ತೆಲೆಯ ಕೊಯ್ವಲ್ಲಿ ಮತ್ತಷ್ಟು ಕೊಯ್ದಾಯ್ತು
ಹೊತ್ತೊಯ್ದು ತಂದಿರುವೆ ಬೆಂಗ್ಳೂರಿಗೆ ||
ಮತ್ತೆಯುಳಿಯುವುದಿಲ್ಲ ಬೇಕೆಂದರಿನ್ನಿಲ್ಲ
ಸುತ್ತಿ ಕೊಂಡೊಯ್ಯಿರೀ ನಿಮ್ಮ ಮನೆಗೆ || ೨ ||
ಮನೆಯ ಮಂದಿಗೆ ಬಿತ್ತು ಪತ್ರಡೆಯ ಕನಸುಗಳು
ನೆನೆಹಾಕಬೇಕಕ್ಕಿಯಿಂದು ನಾನು ||
ಮನವಿಟ್ಟು ಮಾಡುವೆನು ಕೆಸುವಿನೆಲೆಯಡುಗೆಯನು
ಘನವಾದ ತಿನಿಸಿದುವು - ಬರುವಿರೇನು ? || ೩ ||
ಸಿಗದೆ ಹೋಯಿತುಯೆಂದು ಸಂಕಟವ ಪಡಬೇಡಿ
ಬಿಗಿಗೊಳಿಸಿ ತುಟಿಯನ್ನು ಹೊಲೆಯಬೇಡಿ ||
ತಗಲಿಸುವೆ ಪತ್ರಡೆಯ ಪಟವ ಫೇಸ್ಬುಕ್ಕಿನಲಿ
ಮೊಗದಿ ಕಿರುನಗೆ ಸೂಸಿ ಪ್ರತಿಕ್ರಿಯಿಸಿರಿ || ೪ ||
- ಸುರೇಖಾ ಭೀಮಗುಳಿ
29/06/2018
ಚಿತ್ರ : Padma Shrinivas Huilgol
ಕರೆಯದೆಲೆ ಬಂದವನು ಮನ ಸೂರೆಗೊಂಡವನು
ಸರಿದು ಹೋದನು ಮತ್ತೆ ಬಾರೆನೆಂದು ||
ಬರಿದಾಯಿತೆನ್ನೆದೆಯು ಬರಡಾಯಿತೀಬದುಕು
ಭರಿಸಲಾರದ ನೋವು ನನ್ನಲಿಂದು || ೧ ||
ತಲೆಭಾರವಾಗಿಹುದು ಕಣ್ಣು ಕೊಳವಾಗಿಹುದು
ಶಿಲೆಯಾಗಿ ಹೋಯ್ತಲ್ಲ ನನ್ನವನ ಹೃದಯ ||
ಕೊಲೆಯಾಯ್ತು ಪ್ರೀತಿಯದು ದೂರು ಸಲ್ಲಿಸಲೆಲ್ಲಿ ?
ಬೆಲೆ ಕೊಡದೆ ಹೋದನೇ ನನ್ನ ಗೆಳೆಯ ? || ೨ ||
ತಪ್ಪು ಮಾಡಿದೆನೇನು ? ಗುರಿಯ ತಪ್ಪಿದೆನೇನು ?
ಒಪ್ಪುವಂತಹ ದಾರಿ ತಿಳಿಯದಾಯ್ತು ||
ಕಪ್ಪು ಆವರಿಸಿಹುದು ಮನಃಪಟಲದಲ್ಲೆಲ್ಲ
ಜಪ್ಪಯ್ಯನೆಂದರೂ ಶನಿ ಬಿಡದೆಹೋಯ್ತು || ೩ ||
ಇವನ ವಾಕ್ಚಾತುರ್ಯಕ್ಕೆ ಬಲಿಬಿದ್ದೆನೇ ನಾನು ?
ಇವನ ಆಳಂಗಕ್ಕೆ ಮರುಳಾದೆನೆ ? ||
ಇವನ ನೆಚ್ಚಿದೆನೇಕೆ ಮಾತು ಕೊಟ್ಟೆನುಯೇಕೆ ?
ಇವನಿಲ್ಲದೆಯೆ ನಾನು ಇರಬಲ್ಲೆನೆ ? || ೪ ||
ಮರೆಯಲೇ ಬೇಕೇನು ಸರಿದು ಹೋದವನನ್ನು
ವಿರಹದುರಿ ತಾಳುವುದು ಸುಲಭವೇನು ? ||
ಬಿರುಗಾಳಿಯೆದ್ದಿಹುದು ಹೃದಯಸಾಮ್ರಾಜ್ಯದಲಿ
ನೆರಳು ಬೆಳಕಿನ ಆಟ ಮುಗಿಯಿತೇನು ? || ೫ ||
- ಸುರೇಖಾ ಭೀಮಗುಳಿ
29/06/2018
ಚಿತ್ರ : NTB Bhat ಅವರ ವಿಡಿಯೋದಿಂದ ಕದಿಯಲಾಗಿದೆ.
