" ಶೃಂಗಾರ ಗೀತೆ ! "

ಈ ವಯಸ್ಸಲ್ಲಿ ಶೃಂಗಾರ ಗೀತೆ ಬರೀಬಾರ್ದಾ ? ಬರೆಯೋದಕ್ಕೆ ಏನಡ್ಡಿ ?
ವಯಸ್ಸಿಗೂ ರಚಿಸುವ ಕವನಕ್ಕೂ ಸಂಬಂಧ ಇದೆಯಾ ?
ಪ್ರಬುದ್ಧತೆಯ ಈ ವಯಸ್ಸಲ್ಲಿ ಪ್ರೀತಿ-ಪ್ರೇಮದ ಬಗ್ಗೆ ಬರೆದರೆ ಸರಿ ಕಾಣಲ್ಲ ಅನ್ಸತ್ತೆ ನಂಗೆ !
ಅಷ್ಟಕ್ಕೂ ’ಶೃಂಗಾರ’ ಅಂದರೆ ಏನು ? ಅಲಂಕಾರ ಅಂಥ ಅರ್ಥ. ಅಷ್ಟೇ ತಾನೆ ?
ಅನುಪ್ರಾಸ - ಅಂತ್ಯಪ್ರಾಸದೊಂದಿಗೆ ನನ್ನದೊಂದಿಷ್ಟು ಪ್ರಯತ್ನ...
ತಪ್ಪಿದ್ರೆ ನಂಗೇಳಿ.... ತಿದ್ದೋಣ್ವಂತೆ.....
" ಶೃಂಗಾರ ಗೀತೆ ! "
=====================
ನನ್ನ ಕೇಶದ ಗಂಧ ಘಮ್ಮೆಂದರೂ ಕೂಡ
ಚೆನ್ನಮಲ್ಲಿಗೆ ದಂಡೆ ಬೇಕು ಮುಡಿಗೆ ||
ಹೊನ್ನ ಕೊಡಿಸೆನ್ನುತ್ತ ನಿನ್ನ ಕಾಡುವುದಿಲ್ಲ
ಚಿನ್ನ ನೀನಾಗಿರುವೆ ಸಿರಿಬಾಳಿಗೆ || ೧ ||

ಕೆಂಡಸಂಪಿಗೆ ಹೂವು ಗಾಢ ಪರಿಮಳವಹುದು
ಮಂಡೆ ನೋಯುವುದೆನಗೆ ದಟ್ಟ ವಾಸನೆಗೆ ||
ಕೊಂಡು ತಂದರೆಯದನು ನಾನು ಮುಡಿಯುವುದಿಲ್ಲ
ದಂಡವೆನ್ನುತ ನನ್ನ ದೂರದಿರು ಕೊನೆಗೆ || ೨ ||

ಝಲ್ಲೆ ಹೂವನು ತಂದು ಕಣ್ಣೆದುರಿನಲ್ಲಿಡುತ
ಗೆಲ್ಲ ಹೊರಡಲು ಬೇಡ ನನ್ನ ಮನವ ||
ಒಲ್ಲೆ ಮುಡಿಯಲು ನಾನು ಸೀತಾಳ ದಂಡೆಯನು
ಮೊಲ್ಲೆ ಮಾಲೆಯ ತಂದು ತಣಿಸು ತನುವ || ೩ ||

ಬೊಟ್ಟಿಟ್ಟು ಬೈತಲೆಗೆ ಕಿವಿಗೆ ಜುಮುಕಿಯನಿಟ್ಟು
ತೊಟ್ಟಿರುವೆ ಕೊರಳಲ್ಲಿ ಚಂದ್ರಹಾರ ||
ಪುಟ್ಟನೆಯ ತುಟಿಗಿಷ್ಟು ನಸುಗೆಂಪು ಮೆತ್ತಿರುವೆ
ಜುಟ್ಟಿನಲಿ ಘಮಘಮಿಪ ಮೊಲ್ಲೆ ಹಾರ || ೪ ||

ಮಾರುದ್ದ ಮಲ್ಲಿಗೆಯ ನಾನು ಕೇಳಲೆಯಿಲ್ಲ
ಬೇರೇನು ಬೇಡಿಕೆಯು ನನ್ನದಿಲ್ಲ ||
ಮಾರುಹೋಗಿಹ ಮೊಲ್ಲೆ ನನ್ನ ಕೊರಳನು ಬಳಸಿ
ಚಾರುಲತೆ ನೀನೆಂದು ನುಡಿದವಲ್ಲ || ೫ ||

- ಸುರೇಖಾ ಭೀಮಗುಳಿ
06/06/2017
ಚಿತ್ರ : Chandrika Khadilkar
ಕವನಕ್ಕೆ ಸ್ಫೂರ್ತಿ : ಸಹೆ ಕವನಗಳು
ತಿದ್ದುಪಡಿ : ವಿಶ್ವ ಸರ್