"ಸೀತಾಳದಂಡೆ" ಕುರಿತ ನನ್ನ ಭಾಮಿನಿಗಳು.....

ಮುತ್ತಿನಂತಹ ಮುದ್ದು ಹೂಗಳು
ಒತ್ತುವೊತ್ತಾಗರಳಿ ನಗುತಿವೆ
ಸುತ್ತ ಬನವನು ಮರೆಸುವಂತಹ ಸೆಳೆತವೇಕಿವಕೆ ? ||
ಕತ್ತಲೆಯ ಮಳೆಸಂಜೆ ಸಮಯದಿ
ಪತ್ತೆಹಚ್ಚಲು ಗಂಧ ಬೀರದೆ
ಹತ್ತಿ ಕುಳಿತಿವೆ ಮರದ ಮೇಗಡೆ ಯಾತಕಿವು ಹೀಗೆ ? || ೧ ||

ಮುಡಿವೆವೆಂದರೆ ಮುಡಿಯಲಾಗದು
ಬಿಡಿಸಿ ತಿರುಗಿಸಿ ಕಟ್ಟಲಾಗದು
ಕಡೆಗೆ ಬರಿದೇ ನೋಡಿ ತಣಿವುದು ಸಾಧ್ಯವಿದೆಯೆಮಗೆ ||
ಪಡೆದೆನೆಂಬುವುದೊಂದೆ ಸಂಭ್ರಮ
ಜಡೆಯಲಿರಿಸುವ ಖುಷಿಯ ದಕ್ಕದು
ಕಡಿದು ತಾರದೆ ಮರದಲುಳಿಸುವುದದುವೆವೊಳಿತೆಮಗೆ || ೨ ||

ತರಿದು ತಂದರೆ ಉಳಿಯಲಾರದು
ಮುರುಟಿಕೊಳ್ಳುವವೆಲ್ಲ ಹೂಗಳು
ಮರದಲಿದ್ದರೆ ನಗುತಲುಳಿವವುವಿನ್ನು ನಾಲ್ಕು ದಿನ |||
ಸರದ ತರದಲಿ ಕಟ್ಟಲಾರೆವು
ಕೊರಳ ಹಾರವ ಮಾಡಲಾರೆವು
ಇರಲಿ ವನದೇವತೆಯ ಮಡಿಲಲಿ ಸೆಳೆಯುತೆಮ್ಮ ಮನ || ೩ ||

- ಸುರೇಖಾ ಭೀಮಗುಳಿ
02/06/2017
ಚಿತ್ರಕೃಪೆ : ಶ್ರೀವತ್ಸ ಜೋಷಿಯವರ ಗೋಡೆಯಿಂದ ಹಾರಿಸಿದ್ದು .....