" ಭ್ರಮಾನಿರಸನ ! " (ನನ್ನ 131 ನೆಯ ಕವನ)

ನಿನ್ನೆಯ "ಜಾರುತಿದೆ ಮನಸು" ಕವನದ ಮುಂದುವರೆದ ಭಾಗ.....
ಪಾಪಕಣ್ರೀ.... 80 ರ ದಶಕದ ಹೆಣ್ಮಕ್ಕಳು.... ಅಲ್ಲಲ್ಲ ಗಂಡ್ ಮಕ್ಳು ಸಹ.... ಹ ಹ ಹಾ.....

ಶ್ಯಾನುಭೋಗರ ಮನೆಗೆ ಹೋಗಿದ್ದ ಅಪ್ಪಯ್ಯ
ಹಿಂತಿರುಗಿ ಬಂದಾಗ ಮುಖವು ಪೆಚ್ಚು ||
ಹುಡುಗ ಉತ್ತಮನಂತೆ ತಾಯಿ ಜೋರಿಹರಂತೆ
ತಂದೆಗಿದೆ ಧನದಾಹ ಸ್ವಲ್ಪ ಹೆಚ್ಚು || ೧ ||

ಕಂಡ ಕನಸುಗಳೆಲ್ಲ ನೀರ ಪಾಲಾಗೋಯ್ತೆ ?
ಶ್ಯಾನುಭೋಗರ ಮಗನ ಮರೆಯಬೇಕೆ ? ||
ಧನದಾಹವಿಲ್ಲದಿಹ ಮನೆಯ ಹುಡುಕುವುದೆಂತು ?
ಮುಗ್ಧ ಮನಗಳ ಬಾಳು ಬಾಡಬೇಕೆ ? || ೨ ||

ಭಾವಗಳ ಮನದೊಳಗೆ ಬಿಡಬೇಕೊ ಬೇಡವೋ ?
ಕನಸಗಳಿಗವಕಾಶ ತಪ್ಪೊ ಸರಿಯೊ ? ||
ಯಾರನ್ನು ಮೆಚ್ಚುವುದೊ ಯಾರನ್ನು ನೆಚ್ಚುವುದೊ ?
ಇವರೆಲ್ಲರೆದುರಲ್ಲಿ ನಾನು ಕುರಿಯೊ ? || ೩ ||

ಮೃದು ಮನಸು ದಿನದಿನಕೆ ಕಲ್ಲಾಗುತಿಹುದೇಕೋ ?
ಭ್ರಮೆಯ ನಿರಸನ ಎನ್ನ ಕೊಲ್ಲುತಿಹುದು ||
ಅಪ್ಪ ಅಮ್ಮನ ಮನವ ನೋಯಿಸಲು ಮನಸಿಲ್ಲ
ಒಳಗೊಳಗೆ ಅತಿಹಿಂಸೆ ಎನಿಸುತಿಹುದು || ೪ ||

- ಸುರೇಖಾ ಭೀಮಗುಳಿ
03/12/2016
ಚಿತ್ರ : ಅಂತರ್ಜಾಲ