" ಜಾರುತಿದೆ ಮನಸು " ( ನನ್ನ 130 ನೆಯ ಕವನ )

ಒಂದಾನೊಂದು ಕಾಲದಲ್ಲಿ ..... 22 ನೆಯ ವಯಸ್ಸಿನ ಹೆಣ್ಮಗಳು..... ನಾನಲ್ಲಪ್ಪಾ... ಹಹಹಾ.....

ರಾಮ ಭಟ್ಟರ ಮಗನೊ ಕೃಷ್ಣ ಭಟ್ಟರ ಮಗನೊ
ಕನಸಲ್ಲಿ ಬಂದವನು ಯಾರು ಅವನು ? ||
ಪೇಟೆಲೆದುರಾದವನು ಜಾತ್ರೆಯಲಿ ಕಂಡವನು
ಸೊಗಸು ಮೀಸೆಯ ತರುಣ ಮನದಲಿಹನು || ೧ ||

ಹೇಗಿದ್ದರೂ ಸರಿಯೆ ಕೊಂಕನಾಡದೆ ಇರಲಿ
ಮೃದು ಮನದ ಒಬ್ಬಾತ ನನಗೆ ಸಿಗಲಿ ||
ಕನಸು ಕಾಣುವ ವಯಸು ವಿಧಿ ಸಂಚದೇನಿದೆಯೊ ?
ಚೊಕ್ಕನೆಯ ಹೃದಯದವ ಬೇಗ ಬರಲಿ || ೨ ||

ಕೊಂಚ ಕಾಡಿಗೆ ಹೆಚ್ಚೆ ? ಮುಡಿದ ಮಲ್ಲಿಗೆ ಸಾಕೆ ?
ಸಿಂಗಾರವೆನ್ನದಿದುವತಿಯಲ್ಲವೆ ?  ||
ಅವನನ್ನು ಸೆಳೆವುದಕೆ ಈ ಕೋಲವೇತಕೇ ?
ನನ್ನೊಂದು ಕಿರುನೆಗೆಯು ಸಾಕಲ್ಲವೆ ? || ೩ ||

ಸಡಗರದಿ ಬಂದವನು ಶ್ಯಾನುಭೋಗರ ಮಗನು
ಹಗಲಿನಲು ಕಾಡುತಿದೆ ಅವನ ಕನಸು ||
ನೋಟವೊಂದರ ಒಳಗೆ ಹೀಗೇಕೆ ಆಗೋಯ್ತು ?
ಅವನೆಡೆಗೆ ಜಾರುತಿದೆ ನನ್ನ ಮನಸು || ೪ ||

- ಸುರೇಖಾ ಭೀಮಗುಳಿ
02/12/2016
ಚಿತ್ರ : ಅಂತರ್ಜಾಲ