" ನೆನಪುಗಳ ಕುರಿತು........ "

ಮೆಲ್ಲಮೆಲ್ಲನೆ ನನ್ನ ಆವರಿಸದಿರು ನೆನಪೆ
ಸಲ್ಲದಿಹ ವ್ಯಾಮೋಹ ನಿನಗದೇಕೆ ? ||
ಕೊಲ್ಲಲಾರೆಯೊ ನೀನು ಮತ್ತೊಮ್ಮೆ ಎದುರಾಗಿ
ತಲ್ಲಣವ ಸೃಷ್ಟಿಸುವ ಸಂಚದೇಕೆ ? || ೧ ||

ನಿನ್ನ ಇರುವಿಕೆ ನನಗೆ ಹೆಚ್ಚೇನು ಬಾಧಿಸದು
ನಿನ್ನಿಂದ ಕಲಿತಿಹೆನು ಬದುಕ ಪಾಠ ||
ನಿನ್ನಿಂದಲೇ ನನ್ನ ಜೀವನಕೆ ಒಂದರ್ಥ
ನಿನ್ನೊಂದಿಗೇ ನನ್ನ ಬಾಳ ಓಟ || ೨ ||

ಕಹಿನೆನಪುಗಳೆ ಬನ್ನಿ ಕಹಿಯನಲ್ಲಿಯೆ ಬಿಟ್ಟು
ಸಿಹಿನೆನಪುಗಳೆ ನಿಮಗೆ ನನ್ನ ಕರೆಯು ||
ಸಹಿಹಾಕಿ ತೆರಳುತಲಿ ಹೊಸನೆನಪನೊಯ್ಯಿರೀ
ದಹಿಸದಿರಿ ಆತ್ಮವನು ಇದುವೆ ಮೊರೆಯು || ೩ ||

- ಸುರೇಖಾ ಭೀಮಗುಳಿ
04/10/2016
ಚಿತ್ರ : ಅಂತರ್ಜಾಲ