" ಭಾವದೀಪ್ತಿಗೊಂದು ಬಿನ್ನಹ "

ಭಾವದೀಪ್ತಿಯೆ ಏಕೆ ಮಂಕಾಗಿ ಕುಳಿತಿರುವೆ ?
ಮನದಲ್ಲಿ ಕುದಿಯುತಿದೆ ಏನೊ ಮೌನ ||
ನನಗೆ ತಿಳಿಯುದ ಹಾಗೆ ನೋವನುಣ್ಣುವಿಯೇಕೆ ?
ಹರಳುಗಟ್ಟಿದೆ ಏಕೆ ನನ್ನ ಸುಮನ ? || ೧ ||

ಬನ್ನಿರೈ ಭಾವಗಳೆ ನೀವ್ದೂರ ಸರಿಯದಿರಿ
ಹೋಗದಿರಿ ನೀವುಗಳು ನನ್ನ ಬಿಟ್ಟು ||
ನೀವು ತೊರೆದರೆ ಅಲ್ಲಿ ಶೂನ್ಯ ಆವರಿಸುವುದು
ನನ್ನೊಡನೆ ನಿಮಗೇಕೆ ಇಂಥ ಸಿಟ್ಟು ? || ೨ ||

ಭಾವದೀಪ್ತಿಯೆ ನಿನಗೆ ದೃಷ್ಟಿ ತಾಕಿಹುದೇನು ?
ನೀನೇಕೆ ಹೀಗಿಂದು ಸುಮ್ಮನಿರುವೆ ? ||
ನನ್ನ ಬಿನ್ನಹ ಕೇಳಿ ಮತ್ತೊಮ್ಮೆ ಪ್ರಜ್ವಲಿಸು
ನಿನ್ನ ಬೆಳಕಲಿ ನಾನು ಸ್ಫೂರ್ತಿಗೊಳುವೆ || ೩ ||

- ಸುರೇಖಾ ಭೀಮಗುಳಿ
18/08/2016
ಚಿತ್ರ : ಸುಮಂತ ಭೀಮಗುಳಿ