" ಹೆಂಡತಿ ಊರಿಂದ್ಬರುವಳು ಎಂದರೆ "

ಹೆಂಡತಿ ಊರಿಂದ್ಬರುವಳು ಎಂದರೆ
ನನ್ನೆದೆ ಡವಡವ ಎನ್ನುವುದು ||
ಶಿಸ್ತಿನ ಪಾಠವ ಕೇಳುವುದೆಂದರೆ
ನನ್ನಯ ಮನ ಹಿಂಜರಿಯುವುದು || 1 ||

ಅವಳಿಲ್ಲದೆಯೇ ಕಳೆಯುವ ದಿನದಲಿ
ಮನೆಯಲಿ ಅಶಿಸ್ತು ಮೆರೆಯುವುದು ||
ಬೇಕಾಬಿಟ್ಟೀ ಜೀವನ ಶೈಲಿಯು
ನನ್ನನು ಹಿಡಿದಾವರಿಸುವುದು || 2 ||

ಹೆಂಡತಿ ಮನೆಒಳ ಹೆಜ್ಜೆಯನಿಟ್ಟೊಡೆ
ಕಸಗಳು ಸ್ವಾಗತ ಕೋರುವವು ||
ಹಾಸಿಗೆ ಬಟ್ಟೆಯ ಪಾತ್ರೆಯ ರಾಶಿಯು
ನನ್ನಯ ಕಥೆಯನು ಸಾರುವವು || 3 ||

ಅಶಿಸ್ತು ಎಂದರೆ ಅವಳಿಗೆ ಆಗದು
ಎನ್ನವ ವಿಷಯದ ಅರಿವುಂಟು ||
ಹೆಂಡತಿ ಹತ್ತಿರ ಬೈಯ್ಯಿಸಿಕೊಳ್ಳುವ
ಅನುಭವದಲ್ಲಿಯು ಮಜವುಂಟು || 4 ||

- ಸುರೇಖಾ ಭೀಮಗುಳಿ
21/08/2016
ಚಿತ್ರ : ಅಂತರ್ಜಾಲ