"ಛಂದಸ್ಸಿನ ಅಂದ"

ಕವನಗಳ ಲೋಕದಲಿ ಸಂಚರಿಸಿ ನೋಡಿದರೆ 

ಜಗಣ ಗುರು ಛಂದಸ್ಸಿನಂದ ತಿಳಿಯುವುದು ||

ಹೊಳೆಯ ನೀರಲಿ ಇಳಿದು ಕೈಕಾಲುಬಡಿಯದಿರೆ 

ಈಜೆಂಬ ವಿದ್ಯೆಯನು ಹೇಗೆ ಕಲಿಯುವುದು ? || 1 ||

ಒಮ್ಮೆ ಕಲಿತರೆ ವಿದ್ಯೆ, ಬಿಟ್ಟರೂ ಬಿಡದೆಮ್ಮೆ

ತಾನ್ತಾನೆ ಛಂದಸ್ಸು, ಅಂದ ತೋರುವುದು || 

ಕೈಕಾಲುಗಳ ಕಟ್ಟಿ ನೀರಿನಲ್ಲೆಸೆದರೂ 

ಮನಮಾಡೆ ತಕ್ಷಣದಿ ಬದುಕಿ ಬರಬಹುದು || 2 ||

ಅತಿಯಲ್ಲದಾ ವಿದ್ಯೆ, ಮಿತಿಯಲ್ಲಿನಾ ಜ್ಞಾನ 

ಹದದಲ್ಲಿ ಇವೆಯಲ್ಲ ಪದದ ಸಂಪತ್ತು ||

ಮನಸಿಟ್ಟು ಬರೆಯುವೆನು ಮನದ ಭಾವವನೆಲ್ಲ

ನನ್ನಿಂದ ಬರದಿರಲಿ ಕವನಕಾಪತ್ತು || 3 ||

- ಸುರೇಖಾ ಭಟ್, ಭೀಮಗುಳಿ

19/05/2015

"ವೈಶಾಖ ಪುಷ್ಪ"

ವೈಶಾಖ ಬಂತೆಂದು ನಿನಗಾರು ಹೇಳಿದರು ?

ತೆಲೆತುಂಬ ಹೂ ಮುಡಿದು ನಿಂತೆಯಲ್ಲೆ ||

ಹನ್ನೊಂದು ಮಾಸಗಳ ತಪವಿಂದು ಮುಗಿದಿಹುದೆ ?

ಸೌಂದರ್ಯ ಸೂಸುತಿಹೆ ಮೀರಿ ಎಲ್ಲೆ || 1 ||

ಎಲ್ಲಿಂದ ಬಂದು ನೀ ನಮ್ಮೂರ ಸೇರಿದೆಯೋ

ಈ ನೆಲದ ಗಟ್ಟಿತನ ಹೊಂದಲಿಲ್ಲ ||

ಬಿರುಗಾಳಿ ಮಳೆಯೆಂದು ಕೊಂಬೆ ರೆಂಬೆಯೆ ಮುರಿದು

ಧರೆಗುರುಳುವುದೇಕೆ ತಿಳಿಯಲಿಲ್ಲ || 2 ||

ವರ್ಷಕೊಂದಾವರ್ತಿ ಬುಟ್ಟಿಗಟ್ಟಲೆ ಹೂವು

ಹೆಣ್ಣಿನಾ ಮುಡಿಯನ್ನು ಏರಲಿಲ್ಲ ||

ರಕ್ತವರ್ಣದ ಪುಷ್ಪ ಪರಿಪೂರ್ಣವಾದರೂ

ದೇವರಾ ಪೂಜೆಯಲಿ ಸಲ್ಲಲಿಲ್ಲ || 3 ||

-ಸುರೇಖಾ ಭೀಮಹುಳಿ

18/05/2015

ಚಿತ್ರಕೃಪೆ : ಇಂಟರ್ ನೆಟ್

"ಬಾಳಿನಾ ದಾರಿ"

ಬಾಳಿನಾ ದಾರಿಯಲಿ ಏರುಮುಖದಾ ಪಯಣ
ಪಯಣಿಸಲು ನಮ್ಮ ಮನ ಸಿದ್ಧವಿರಲಿ ||
ಗುರಿಯ ಮುಟ್ಟಿದ ಮೇಲೆ ನೋಡುವಾ ದೃಶ್ಯಗಳು
ಪಯಣದಾ ಕಷ್ಟಗಳ ಮರೆಸಿಬಿಡಲಿ || 1 ||

ಒಮ್ಮೆ ಏರುವ ದಾರಿ, ಮತ್ತೆ ಇದೆ ಸಮತಟ್ಟು
ಎದುರಿಸುವ ಕೆಚ್ಚು ಅದು ಹೆಚ್ಚುತಿರಲಿ ||
ಇದೆ ದಾರಿ ಬೇಕೆಂಬ ಆಯ್ಕೆಯು ನಮಗಿಲ್ಲ
ಕಲ್ಲು ಮುಳ್ಳಿನ ದಾರಿ ಮರೆಯದಿರಲಿ || 2 ||

ಕಷ್ಟಗಳು ಬಂದಾಗ ಎದುರಿಸುವ ಮನ ಬೇಕು
ಸುಖವೆನ್ನುವುದರ ಬೆಲೆ ಹೆಚ್ಚು ಆಗ ||
ನಷ್ಟಗಳು ಬಾರದೇ ನೋವಿನನುಭವವಿರದೆ
ನಮ್ಮ ಅರಿವಿಗೆ ಬರದು ರಾಜ ಯೋಗ || 3 ||

ದೇವನುದ್ಯಾನದಲಿ ಬೆಳೆದ ಗಿಡಗಳು ನಾವು
ಹೇಗೆ ಬಾಳಿಸಬೇಕು ಅವನ ಹಕ್ಕು ||
ತೋಟದಾ ಮಾಲೀಕ, ಮಾಲಿಯೂ ಆತನೇ
ಅವನೆದುರು ನಡೆದೀತೆ ನಮ್ಮ ಸೊಕ್ಕು ? || 4 ||

ಸುರೇಖಾ ಭೀಮಗುಳಿ
08/05/2015

ಛಾಯಾಚಿತ್ರ : ಸುಮಂತ ಭೀಮಗುಳಿ
ಸ್ಥಳ : ಗಡಾಯಿಕಲ್ - ಉಜಿರೆ ಸಮೀಪ
ಸಂದರ್ಭ : 2013 ಫೆಬ್ರವರಿ 10. ಮೈಸೂರು ಯೂತ್ ಹಾಸ್ಟೆಲ್ ನವರ ಜೊತೆ ನಮ್ಮ ಕುಟುಂಬದ ಟ್ರಕ್ಕಿಂಗ್ ಸವಿನೆನಪು....