"ಯುಗಾದಿ ಆಶಯ"

ಯುಗಾದಿ ಬಂದಿದೆ ಹಿಗ್ಗನು ತಂದಿದೆ

ಬಾಳಿನ ನಂದನ ವನದಲ್ಲಿ ||

ಸುಖ ಸಂಭ್ರಮಗಳು ತುಂಬಿ ತುಳುಕಲಿ

ನಮ್ಮಯ ಬಾಳಿನ ಪಥದಲ್ಲಿ || 1 ||

ಹೊಂಗೆಯ ಮರದಲಿ ಹೂವುಗಳರಳಿವೆ

ದುಂಬಿಯ ನರ್ತನ ಒಡನಾಟ ||
ಹಸಿರಿನ ಹೆಮ್ಮರ ಬಿಳಿಬಿಳಿ ಹೂಗಳು
ಅಂಗಳದಲ್ಲಿನ ತಿಳಿನೋಟ || 2 ||

ಇಂದಿನವರೆಗಿನ ಕಹಿ ನೆನಪೆಲ್ಲವು 
ಮರೆಯಾಗಲಿ ಮನದೊಡಲಿಂದ ||
ತುಂಬಲಿ ಸಂತಸ - ಉಕ್ಕಲಿ ಹರುಷ
ನಮ್ಮಯ ಬಾಳಿನ ಕಡಲಿಂದ || 3 ||

ಪ್ರಕೃತಿ ಹಸಿರಿನ ಉಡುಗೆಯ ತೊಟ್ಟು
ಬಂದಳು ನಮ್ಮನು ಹರಸುತ್ತ ||
ಕರುಣೆಯ ಸವಿಯನು ಸವಿಯುವ ಬನ್ನಿರಿ
ಆಕೆಯ ಪಾದಕೆ ನಮಿಸುತ್ತ || 4 ||

- ಸುರೇಖಾ ಭಟ್, ಭೀಮಗುಳಿ
21/03/2015