" ನಾನ್ ಹೇಳೋದ್ ಕೇಳ್ರೀ..... " (ವಿ.ಸೂ. : ವಿವಾಹಯೋಗ್ಯರಿಗಾಗಿ ಈ ಕವನ)

ಹರೆಯದಲ್ಲಿ ಅಪ್ಪಿತಪ್ಪಿ
ಕಂಡ ಪುಟ್ಟ ಕನಸಿಗೆ ||
ವಿಧಿಯ ನಿಯಮ ಬಿದ್ದುಬಿಟ್ಟೆ
ಇವಳ ಪ್ರೀತಿ ಬುಟ್ಟಿಗೆ || ೧ ||

ಭಯದ-ಭಕುತಿ ಕೇಳಬೇಡಿ
ಗಂಡನಲ್ಲಿ ಈಕೆಗೆ ||
ವಿನಯವೆಂದರೇನು ಎಂಬ
ದೊಡ್ಡ ಪ್ರಶ್ನೆಯಾಕೆಗೆ || ೨ ||

ಕಣ್ಣಸನ್ನೆಯಲ್ಲೆ ನನ್ನ
ಹಿಡಿತದಲ್ಲಿಯಿಡುವಳು ||
ಪ್ರೀತಿಯೆಂಬ ಅಸ್ತ್ರದಲ್ಲಿ
ಕಟ್ಟಿ ಹಾಕಿ ಬಿಡುವಳು || ೩ ||

ತನ್ನದೆಲ್ಲ ಬಿಟ್ಟುಕೊಟ್ಟು
ಹೆಮ್ಮೆಯಿಂದ ನಗುವಳು
’ನೀನು ನನಗೆ ಸ್ವಂತ ಕಾಣೊ ’
ಎನುತ ಲಲ್ಲೆಗರೆವಳು || ೪ ||

ಪ್ರೇಮಪಾಶವೆಂಬ ಬಂಧ
ಚಂದವಿಹುದು ಕೇಳಿರಿ ||
ಇಂಥ ಸವಿಯು ನಿಮಗು ಸಿಗಲಿ
ಬೇಗ ಮದುವೆಯಾಗಿರಿ || ೫ ||

 - ಸುರೇಖಾ ಭೀಮಗುಳಿ
03/08/2017
ಚಿತ್ರ : ಅಂತರ್ಜಾಲ