" ದಾಂಪತ್ಯ ಗೀತೆ "

ಹಲವು ವರುಷ ಕಳೆದು ಹೋಯ್ತು
ಜಂಟಿಬಾಳಿನಂಟಿಗೆ ||
ದಿನವು ದಿನವು ಹೊಸತು ಹರೆಯ
ನನ್ನ- ಅವನ ಜೋಡಿಗೆ || ೧ ||

ಭಕ್ತಿಭಾವವೇನುಯಿಲ್ಲ
ಎಂಬ ವಿಷಯ ಸತ್ಯವೆ ||
ಅದರ ಮೀರಿ ಪ್ರೀತಿಯುಂಟು
ಎನ್ನದಿರಲು ಸಾಧ್ಯವೆ ? || ೨ ||

ಸಣ್ಣ-ಪುಟ್ಟ ಮುನಿಸುಗಳಿವೆ
ಎಂದು ನಾನು ಒಪ್ಪುವೆ ||
ಅಷ್ಟಕಾಗಿಯವನ ದೂರಿ
ದೂರ ನಿಲುವುದುಚಿತವೆ ? || ೩ ||

ಕಷ್ಟ-ನಷ್ಟ ಯಾರಿಗಿಲ್ಲ
ಸಹಜವದುವು ಬಾಳಲಿ ||
ಶಿಷ್ಟನವನು ಎಂಬ ವಿಷಯ
ಸ್ಪಷ್ಟವಿಹುದು ನನ್ನಲಿ || ೪ ||

ಸರಸ-ವಿರಸ, ನೋವು-ನಲಿವು
ಜೋಡಿ ಪದಗಳಲ್ಲವೆ ?  ||
ಕೆಲವು ಮಾತ್ರ ನನಗೆ ಬೇಕು
ಎಂಬ ನಿಲುವು ಸಾಧುವೆ ? || ೫ ||

ಗಂಡ-ಹೆಂಡಿರೆಂಬ ಜೋಡಿ
ದೈವವಿತ್ತ ವರವದು ||
ಉಳಿದ ನಮ್ಮ ಬಂಧವೆಲ್ಲ
ನಾವು ಮಾಡಿಕೊಂಡುದು ||  ೬ ||

ನಿಮ್ಮ ಸ್ನೇಹ ಪ್ರೀತಿಯಲ್ಲಿ
ಇಲ್ಲ ತಪ್ಪು ಬಲ್ಲೆನು ||
ನನ್ನ-ಅವನ ಪರಿಧಿಯಲ್ಲಿ
ಬೇರೆಯವರನೊಲ್ಲೆನು  || ೭ ||

- ಸುರೇಖಾ ಭೀಮಗುಳಿ
03/08/2017
ಚಿತ್ರ : ಆಂತರ್ಜಾಲ

ತಿದ್ದುಪಡಿ ಮಾರ್ಗದರ್ಶನ : ವಿಶ್ವ ಸರ್.