"ಮಲೆನಾಡಿನಲ್ಲೊಂದು ಮಳೆಸಂಜೆ"

ತಿರೆಯೆಲ್ಲ ಹಸಿಹಸಿರು
ಪರಿಶುದ್ಧ ಪರಿಸರವು
ಚುರುಕಾಗಿ ನಡೆಯುತಿದೆ ಜಗದ ಲೀಲೆ ||
ತೊರೆಯಲ್ಲಿ ಸಿಹಿನೀರು
ತರುಲತೆಗೆ ಹೊಸ ಬಸಿರು
ಹೊರಜಗದ ಬೆರಗೆದುರು ನಾನು ಬಾಲೆ ||⁠⁠⁠⁠ ೧ ||

ಧರೆಯೆಲ್ಲ ತನದೆನುತ
ಪರಿಪರಿಯ ಕೀಟಗಳು
ಮೆರೆದಿಹವು ಮಳೆಗಾಲ ಸಂಜೆಯಲ್ಲಿ ||
ಕಿರಿಯ ಜೀವಗಳೆಲ್ಲ
ಹಿರಿಯ ದನಿಯನು ತೆಗೆದು
ಇರುವಿಕೆಯನೊರೆಯುತಿಹ ಹಬ್ಬವಿಲ್ಲಿ || ೨ ||

ಟಿರಿಟಿರಿಯ ಶಬ್ದವನು
ಮೊರೆಯುತಿಹ ಬಿರಿಬಿಟ್ಟಿ
ದೊರೆತನದ ಹಮ್ಮಿನಲಿ ಮೆರೆಯುತಿಹುದು ||
ಪರರ ಚಿಂತೆಯ ಬಿಟ್ಟು
ಸರಸಕ್ಕೆ ಹಾತೊರೆಯು-
ತರಸಿಯನ್ನರಸುತ್ತ ತಪಿಸುತಿಹುದು || ೩ ||

- ಸುರೇಖಾ ಭೀಮಗುಳಿ
23/08/2017
ಸ್ಥಳ/ಚಿತ್ರ : ನಮ್ ಹೆಡ್ಡಾಫೀಸು- ಪಾಲಾಲೆ ಮನೆ
ಛಾಯಾಗ್ರಾಹಕ : ಸುಮಂತ ಭೀಮಗುಳಿ 

ಕವನಕ್ಕೊಂದಿಷ್ಟು ವಿವರಣೆ :
ಈ ಕವನ ಕುಸುಮ ಷಟ್ಪದಿಯಲ್ಲಿದೆ.
ತಿದ್ದುಪಡಿ ಮಾರ್ಗದರ್ಶನ : ವಿಶ್ವ ಸರ್ ..
ಬಿರಿಬಿಟ್ಟಿ =ಇರಿಂಟಿ = ಜೀರುಂಡೆ

" ನಾನ್ ಹೇಳೋದ್ ಕೇಳ್ರೀ..... " (ವಿ.ಸೂ. : ವಿವಾಹಯೋಗ್ಯರಿಗಾಗಿ ಈ ಕವನ)

ಹರೆಯದಲ್ಲಿ ಅಪ್ಪಿತಪ್ಪಿ
ಕಂಡ ಪುಟ್ಟ ಕನಸಿಗೆ ||
ವಿಧಿಯ ನಿಯಮ ಬಿದ್ದುಬಿಟ್ಟೆ
ಇವಳ ಪ್ರೀತಿ ಬುಟ್ಟಿಗೆ || ೧ ||

ಭಯದ-ಭಕುತಿ ಕೇಳಬೇಡಿ
ಗಂಡನಲ್ಲಿ ಈಕೆಗೆ ||
ವಿನಯವೆಂದರೇನು ಎಂಬ
ದೊಡ್ಡ ಪ್ರಶ್ನೆಯಾಕೆಗೆ || ೨ ||

ಕಣ್ಣಸನ್ನೆಯಲ್ಲೆ ನನ್ನ
ಹಿಡಿತದಲ್ಲಿಯಿಡುವಳು ||
ಪ್ರೀತಿಯೆಂಬ ಅಸ್ತ್ರದಲ್ಲಿ
ಕಟ್ಟಿ ಹಾಕಿ ಬಿಡುವಳು || ೩ ||

ತನ್ನದೆಲ್ಲ ಬಿಟ್ಟುಕೊಟ್ಟು
ಹೆಮ್ಮೆಯಿಂದ ನಗುವಳು
’ನೀನು ನನಗೆ ಸ್ವಂತ ಕಾಣೊ ’
ಎನುತ ಲಲ್ಲೆಗರೆವಳು || ೪ ||

ಪ್ರೇಮಪಾಶವೆಂಬ ಬಂಧ
ಚಂದವಿಹುದು ಕೇಳಿರಿ ||
ಇಂಥ ಸವಿಯು ನಿಮಗು ಸಿಗಲಿ
ಬೇಗ ಮದುವೆಯಾಗಿರಿ || ೫ ||

 - ಸುರೇಖಾ ಭೀಮಗುಳಿ
03/08/2017
ಚಿತ್ರ : ಅಂತರ್ಜಾಲ

" ದಾಂಪತ್ಯ ಗೀತೆ "

ಹಲವು ವರುಷ ಕಳೆದು ಹೋಯ್ತು
ಜಂಟಿಬಾಳಿನಂಟಿಗೆ ||
ದಿನವು ದಿನವು ಹೊಸತು ಹರೆಯ
ನನ್ನ- ಅವನ ಜೋಡಿಗೆ || ೧ ||

ಭಕ್ತಿಭಾವವೇನುಯಿಲ್ಲ
ಎಂಬ ವಿಷಯ ಸತ್ಯವೆ ||
ಅದರ ಮೀರಿ ಪ್ರೀತಿಯುಂಟು
ಎನ್ನದಿರಲು ಸಾಧ್ಯವೆ ? || ೨ ||

ಸಣ್ಣ-ಪುಟ್ಟ ಮುನಿಸುಗಳಿವೆ
ಎಂದು ನಾನು ಒಪ್ಪುವೆ ||
ಅಷ್ಟಕಾಗಿಯವನ ದೂರಿ
ದೂರ ನಿಲುವುದುಚಿತವೆ ? || ೩ ||

ಕಷ್ಟ-ನಷ್ಟ ಯಾರಿಗಿಲ್ಲ
ಸಹಜವದುವು ಬಾಳಲಿ ||
ಶಿಷ್ಟನವನು ಎಂಬ ವಿಷಯ
ಸ್ಪಷ್ಟವಿಹುದು ನನ್ನಲಿ || ೪ ||

ಸರಸ-ವಿರಸ, ನೋವು-ನಲಿವು
ಜೋಡಿ ಪದಗಳಲ್ಲವೆ ?  ||
ಕೆಲವು ಮಾತ್ರ ನನಗೆ ಬೇಕು
ಎಂಬ ನಿಲುವು ಸಾಧುವೆ ? || ೫ ||

ಗಂಡ-ಹೆಂಡಿರೆಂಬ ಜೋಡಿ
ದೈವವಿತ್ತ ವರವದು ||
ಉಳಿದ ನಮ್ಮ ಬಂಧವೆಲ್ಲ
ನಾವು ಮಾಡಿಕೊಂಡುದು ||  ೬ ||

ನಿಮ್ಮ ಸ್ನೇಹ ಪ್ರೀತಿಯಲ್ಲಿ
ಇಲ್ಲ ತಪ್ಪು ಬಲ್ಲೆನು ||
ನನ್ನ-ಅವನ ಪರಿಧಿಯಲ್ಲಿ
ಬೇರೆಯವರನೊಲ್ಲೆನು  || ೭ ||

- ಸುರೇಖಾ ಭೀಮಗುಳಿ
03/08/2017
ಚಿತ್ರ : ಆಂತರ್ಜಾಲ

ತಿದ್ದುಪಡಿ ಮಾರ್ಗದರ್ಶನ : ವಿಶ್ವ ಸರ್.

" ತಪ್ಪೇನು ? ನೀವಾದ್ರೂ ಹೇಳಿ "

ಮದುವೆಯಾಗಿ ತಿಂಗಳಿಲ್ಲ
ನೋಡಿರಣ್ಣ ಹೀಗಿದೆ || 
ಮಡದಿ ಹೇಳಿದಂತೆಯೆಲ್ಲ
ಕೇಳುವಂತೆ ಆಗಿದೆ ! || ೧ ||

ಅಡುಗೆ ಮಾಡಿ ಬಟ್ಟಲಿಟ್ಟು
ಉಣ್ಣಬನ್ನಿರೆನುವಳು ||
ಕೈಯ್ಯತುತ್ತು ಕೇಳಿದೊಡನೆ
ಬಾಯ್ಗೆ ತುತ್ತನೀವಳು || ೨ ||

ಸಂಜೆಯಲ್ಲಿ ಬೀಸುನಡಿಗೆ
ಜೊತೆಯ ಬಿಡದೆ ಸಾಗಿದೆ ||
ದಿನಸಿಯಂಗಡೀಗು ಕೂಡ
ಒಂಟಿಪಯಣ ನಿಂತಿದೆ || ೩ ||

ದಿನದಲೊಮ್ಮೆ ಮೀಯಿರೆಂದು
ಬಚ್ಚಲೆಡೆಗೆ ನೂಕ್ವಳು ||
’ಜೊತೆಗೆ ಬಾರೆ ನೀನು’ ಎನಲು
’ಹೋಗಿ ಪೋಲಿ !’ ಎನುವಳು || ೪ ||

ಹಗಲು-ರಾತ್ರಿಯವಳ ಜೊತೆಗೆ
ಜೀವಜಂಟಿಯಾಗಿದೆ ||
ನನ್ನ ಕರೆಯಲೇನು ತಪ್ಪು
ನನಗೆ ತಿಳಿಯದಾಗಿದೆ ! || ೫ ||

ಆಕೆಯೇನು ನುಡಿದರೂನು
ಎದುರು ಮಾತು ಮರೆತಿದೆ ||
ಅವಳ ಕೆನ್ನೆ ಕೆಂಪ ನೋಡಿ
ಮನಸು ಸಂತೆಯಾಗಿದೆ || ೬ ||

- ಸುರೇಖಾ ಭೀಮಗುಳಿ
01/08/2017
ಚಿತ್ರ : ಅಂತರ್ಜಾಲ
ತಿದ್ದುಪಡಿ ಮಾರ್ಗದರ್ಶನ : ವಿಶ್ವ ಸರ್.