" ಶ್ರಾವಣ ಸಂಭ್ರಮ... ! "

ದ.ರಾ.ಬೇಂದ್ರೆಯವರ
’ಬಂಗಾರ ನೀರ ಕಡಲಾಚೆಗೀಚೆಗಿದೆ ನೀಲ ನೀಲ ತೀರಾ
ಮಿಂಚುಬಳಗ ತೆರೆತೆರೆಗಳಾಗಿ ಅಲೆಯುವುದು ಪುಟ್ಟಪೂರಾ’
ಹಾಡಿನ ರಾಗದಲ್ಲಿ ಹಾಡಿಕೊಳ್ಳಿ.....

ತೊಂಬತ್ತರ ದಶಕದ ಪ್ರೇಮಗೀತೆ ಅಂದ್ಕೊಳ್ಳಿ ಆಯ್ತಾ .....

ಇನ್ನು ಚಿತ್ರ ಅಂತರ್ಜಾಲದಿಂದ ಎತ್ತಿಕೊಂಡದ್ದು... ಚಿತ್ರದಲ್ಲಿರುವ ಹುಡುಗನ ಕಣ್ಣಲ್ಲಿ ಪ್ರಾಮಾಣಿಕತೆ ಕಾಣಿಸ್ತು ನಂಗೆ... ಜೊತೆಗೆ dairy milk shots ನೆನೆಪು ಬಂತು.... ಈಗಿನ ಕವಿಗಳೆಲ್ಲ ಬರೀ ಹುಡುಗಿಯರ ಚಿತ್ರ ಹಾಕ್ಕೊಂಡು ಕವನ ಬರೀತಾರೆ.... ಆದ್ರೆ ಹುಡುಗರ ಚಿತ್ರ ಹಾಕಿ ಕವನ ಬರೆಯೋರೆ ಇಲ್ಲ ಕಣ್ರೀ.... ಅದಕ್ಕೇ ಸ್ವಲ್ಪ ಬದಲಾವಣೆ ಇರಲಿ ಅಂಥ ಈ ಫೋಟೋ... ಅಷ್ಟು ಬಿಟ್ಟರೆ ಈ ಫೋಟೋಗೂ ನನಗೂ ಏನೂ ಸಂಬಂಧ ಇಲ್ಲ ಕಣ್ರೀ.... ನನ್ನನ್ನು ನಂಬಿ... ಹ ಹ ಹಾ....

" ಶ್ರಾವಣ ಸಂಭ್ರಮ... ! "

ಹಲದಿನಗಳಿಂದ ಮನಸೆಳೆದ ಗೆಳತಿ ಬಂದಿಹಳು ನನ್ನ ಮನೆಗೆ ||
ಬಲುತೋಷದಿಂದ ಹುಚ್ಚಾಯ್ತು ಮನವು ತುಸುಹಿಡಿತ ತಪ್ಪಿತೆನಗೆ || ೧ ||

ಬರಬಾರದಿತ್ತೆ ? ರಸಭಂಗವಾಯ್ತೆ ? ಕೇಳುತಿರೆ ಗೆಳತಿಯಾಗ ||
ಕರೆದಾಗ ಬರದೆಯಿಂದೇನು ಬಂದೆ ದಯಮಾಡಿಸೆಂದೆನಾಗ || ೨ ||

ಮನವಿರದ ಸಮಯ ಬಂದದ್ದು ತಪ್ಪು ನಾ ಹೊರಟೆನೆಂದಳಾಕೆ ||
ಕನಸಲ್ಲಿ ನೆನೆದ ರಸಘಳಿಗೆಯೊದಗೆ ನಾ ಬಿಟ್ಟುಬಿಡುವುದ್ಯಾಕೆ ? || ೩ ||

ಎಸೆದಾಕೆಯೆಡೆಗೆ ನಸುನಗೆಯ ಬಾಣ ಬಾರೆಂದೆ ಮನೆಯ ಒಳಗೆ
ತುಸುಬಿಂಕ ತೋರಿ ಕಣ್ಣಲ್ಲೆ ನಕ್ಕಳಾಕೆಯದು ಹಂಸ ನಡಿಗೆ || ೪ ||

ಒಪ್ಪಾದ ಹುಡುಗಿ ಬಳಕುತ್ತ ನಾಚಿ ಪಿಸುಮಾತನುಲಿಯುತಿರಲು 
’ಒಪ್ಪಿಹರು ನಮ್ಮ ಮನೆಮಂದಿಯೆಲ್ಲ- ಕಳುಹಿಹರು ಕರೆದು ತರಲು’ || ೫ ||

ಕಹಿದಿನವು ಕಳೆದು ಶ್ರಾವಣವು ಬಂತು ಬಾಳಾಯ್ತು ಹಬ್ಬದಡುಗೆ ||
ಸಿಹಿಲಾಡು ಬಂದು ಬಾಯೊಳಗೆ ಬಿತ್ತು ಹೋಳಿಗೆಯ ಕವಳ ನಿಮಗೆ || ೬ ||

- ಸುರೇಖಾ ಭೀಮಗುಳಿ
25/07/2017
ಚಿತ್ರ : ಅಂತರ್ಜಾಲ

ತಿದ್ದುಪಡಿ ಮಾರ್ಗದರ್ಶನ : Vishwanath Kukian K ಸರ್.

ಮಧ್ಯಮಾವರ್ತಲಯ.
೨ ೩ ೩ ೨ ೩ ೩ ೨ ೩ ೩ ೩ = ೨೭
೫ ೩ ೫ ೩ ೫ ೩ ೩ = ೨೭