ಮುತ್ತಿನಂತಹ ಹುಡುಗಿ .....

ವರ್ಷದ ಹಿಂದೆ... Mohini Damle - Krishna Koulagi ಯವರೊಂದಿಗಿನ ಜುಗಲ್ಬಂದಿಯಲ್ಲಿ ಅರಳಿದ ಕವನ. ಈಗ ಆದಿಪ್ರಾಸಕ್ಕೆ ಅನುಗುಣವಾಗಿ.... ವಿಶ್ವ ಸರ್ ಮಾರ್ಗದರ್ಶನದೊಂದಿಗೆ...
ಚಿತ್ರ : divakara Dongre M ಅವರ ಗೋಡೆಯಿಂದ...

ಮುತ್ತಿನಂತಹ ಹುಡುಗಿ .....

ಮುತ್ತಿನಂತಹ ಹುಡುಗಿ ಕನಸುಗಣ್ಣಿನ ಬೆಡಗಿ
ಸುತ್ತೇಳು ಲೋಕಕ್ಕೆ ಬಲುಸೊಬಗಿನರಸಿ ||
ಕತ್ತಲ್ಲಿವೊಂದೆಳೆಯ ಸಣ್ಣಸರ-ಮಣಿಪದಕ
ಮತ್ತೆ ಜೇನ್ದುಟಿಯಲ್ಲಿ ನಸುನಗುವ ಮೆರೆಸಿ || ೧ ||

ಕೆಂಪು ರವಿಕೆಯ ಕುವರಿ ಬಿಂಕದಲಿ ನೋಡಿಹಳು
ತಂಪು ಬಾಲ್ಯವು ನನ್ನ ಕಣ್ಣ ಮುಂದೆ ||
ಸಂಪಿಗೆಯ ಮರದ ಕೆಳಗಾಡೋಣವೆಂದಿಹಳು
ಗುಂಪಿನಲಿ ಹೊರಡೋಣವವಳ ಹಿಂದೆ || ೨ ||

ಕಾಡುಮೇಡುಗಳಲ್ಲಿ ಗದ್ದೆಬಯಲುಗಳಲ್ಲಿ
ಆಡುವಾಸೆಯು ನಿಮ್ಮದಲ್ಲವೇನು? ||
ಜೋಡಿಯಾಗಿರಿ ನನ್ನ ಬಾಲ್ಯದೆಡೆ ಪಯಣಕ್ಕೆ 
ದೂಡಿ ಹೊರೆ ದುಗುಡಗಳ ಬರುವಿರೇನು ? || ೩ ||

ಪೋರಿಯೋಡಿಹಳಲ್ಲ ನನ್ನ ಸೆಳೆಯುತ ಹೀಗೆ
ಬಾರೆಬಾ ಜೊತೆಗೂಡುಯೆನ್ನುವಂತೆ ||
ಜಾರಿ ಹೋಗಿಹುದೆನ್ನ ವಾಸ್ತವದ ನೆನಪುಗಳು
ತೋರಿಹುದು ನಾನಾಕೆಯೆನ್ನುವಂತೆ || ೪ ||

- ಸುರೇಖಾ ಭೀಮಗುಳಿ
06/07/2017