" ಬಿಕ್ಕಳಿಸುತ್ತಿರುವ ಮನಕ್ಕೊಂದಿಷ್ಟು ಸಾಂತ್ವನ "

ಉಕ್ಕಿ ಬರುತಿದೆ ದುಃಖ ಬಿಕ್ಕಳಿಸುತಿದೆ ಮನಸು
ಸುಕ್ಕುಗಟ್ಟಿದೆ ಮೌನ ಯಾಕೆ ಹೀಗೆ ? ||
ದಿಕ್ಕು ತಪ್ಪಿದೆ ಸ್ನೇಹ ಹಕ್ಕು ಸಾಧಿಸಲರಿಯೆ
ಸಿಕ್ಕೀತೆ ಪರಿಹಾರ ಕಟ್ಟಕಡೆಗೆ ? || ೧ ||

ದಿಕ್ಕುಗೆಟ್ಟವರಂತೆ ಮುಕ್ಕಾಗದಿರು ಮನವೆ
ದಕ್ಕಲೇ ಬೇಕೆಂಬ ಹಠವದೇಕೆ ? ||
ಪಕ್ಕಾಗಲೀ ಸಮಯ ಚೊಕ್ಕಗೊಳ್ಳಲಿ ಹೃದಯ
ತಿಕ್ಕಾಟವದು ಸಹಜ ಬದುಕುವುದಕೆ || ೨ ||

ತಿಕ್ಕಿದಾಗಲೆ ಚಿನ್ನ ಚಕ್ಕಂಥ ಹೊಳೆಯುವುದು
ಚಿಕ್ಕ ನೆವವೂ ಸಾಕು ಸ್ವಂತ ಖುಷಿಗೆ ||
ನಕ್ಕುಬಿಡು ಒಂದು ಕ್ಷಣ ಮಿಕ್ಕಿದ್ದ ವಿಧಿಗೆ ಬಿಡು
ಸಕ್ಕರೆಯ ಸವಿಯುಂಟು ನಿನ್ನ ನಗೆಗೆ || ೩ ||

- ಸುರೇಖಾ ಭೀಮಗುಳಿ
23/09/2016
ಚಿತ್ರ : ಅಂತರ್ಜಾಲ