"ರಂಗ-ರಂಗ-ರಂಗ"

ರಂಗನ ಕೊಳಲಿನ ಗಾನವ ಕೇಳುವ 

ತುಡಿತವು ಹೆಚ್ಚಿತು ಒಂದು ದಿನ ||

ಯಮುನಾ ತೀರವ ಮನದಲ್ಲಿರಿಸಿ 

ಧ್ಯಾನಸ್ಥಳಾದೆನಾ ಸುದಿನ ||೧||

ವೃಂದಾವನದಾ ಸುಂದರ ಚಿತ್ರಣ 

ಕಣ್ಣಿಗೆ ಕಟ್ಟಿತು ಎದುರಲ್ಲಿ ||
ಗೋವ್ಗಳ ಜೊತೆಯಲಿ ರಂಗನು ಬಂದನು
ಗೋಪಬಾಲರ ಜೊತೆಯಲ್ಲಿ ||೨||

ಕೊಳಲನು ಪಿಡಿದಾ ರಂಗನು ನಿಂದನು
ಮರದಾ ಕೆಳಗಿನ ನೆರಳಿನಲಿ ||
ಗೋವ್ಗಳು-ಗೆಳೆಯರು-ಪಶು ಪಕ್ಷಿಗಳು
ಸರ್ವರು ನೆರೆದರು ಆಸ್ಥೆಯಲಿ ||೩||

ಕೊಳಲಿನ ನಾದವು ಹೊರಹೊಮ್ಮುತಲಿರೆ
ಸಂಗೀತದ ರಸ ಧಾರೆಯಲಿ ||
ನಿಂದಳು ಯಮುನೆಯು ಬೆರೆತಳು ಗಾನದಿ
ರಂಗನ ಸೇರುವ ಭಾವದಲಿ ||೪||

ಭವವು ಮರೆಯಿತು ಭಾವವು ಮೆರೆಯಿತು
ನಾನಾರೆಂಬುದು ಮರೆತಿಹುದು ||
ಮೈಮನ ತುಂಬಿತು ಕೊಳಲಿನ ಇಂಪದು
ಗಾಯನ ನನ್ನಲಿ ಬೆರೆತಿಹುದು ||೫||

ಬೆಣ್ಣೆಯ ರೂಪದ ಮನವನು ಕದಿಯಲು
ರಂಗನು ಭೂಮಿಗೆ ಬಂದಿಹನು ||
ಚಿಂತೆಯ ಮಾಡದೆ ಅರ್ಪಿಸೋಣವೇ 
ನಮ್ಮದು ಎನ್ನುವ ಸರ್ವವನು ||೬||

ಅರ್ಪಿಸ ಹೊರಟಿಹ ನಮ್ಮದೆಲ್ಲವೂ 
ಅವನ ಕರುಣೆಯ ಕೃಪೆತಾನೆ ? ||
ನಾನು ನನ್ನದು ಎನ್ನುವುದೆಲ್ಲವೂ
ನಮ್ಮದೇನಲ್ಲ ನಿಜತಾನೆ ? ||೭||

ಮೋಹದ ಜೊತೆಯಲಿ ಮೋಹನನಿರನು
ಎನ್ನುವ ವಿಷಯವ ತಿಳಿಯೋಣ ||
ಭವಸಾಗರವನು ದಾಟಿಸು ಎನ್ನುತ
ರಂಗನ ಜೊತೆಯಲಿ ಬೆರೆಯೋಣ ||೮||

-ಸುರೇಖಾ ಭಟ್, ಭೀಮಗುಳಿ
08/02/2015