"ಏನಾಯ್ತ್ಹೇಳೇ....."

ಏನಾಯ್ತೆ ಸಿಂಗಾರಿ ಸಿರಿಮೊಗದ ಬಂಗಾರಿ
ಏನಮ್ಮ ನಿನಚಿಂತೆ ಹೇಳ್ಬಾರದೆ ? ||
ಮೌನವಾಚರಿಸುತ್ತ ಕುಳಿತೆಯೇತಕೆ ಹೀಗೆ
ನಿನ್ನನರಿಯುವುದೆಂತು ನೀನ್ಹೇಳದೆ ? || ೧ ||

ತಿದ್ದಿ ತೀಡಿದ ರೂಪ ಕಳೆದುಕೊಂಡಿದೆ ಕಳೆಯ
ಮುದ್ದು ಸುರಿಯುವ ತುಟಿಗೆ ನಗುವಿಲ್ಲದೆ ||
ಸದ್ದಿರದೆ ಹೊಳೆಯುತಿದೆ ಕಿವಿಯ ಚಿನ್ನಾಭರಣ
ಬಿದ್ದುಕೊಂಡಿದೆ ಕೇಶ ಒಪ್ಪವಿರದೆ || ೨ ||

ಖಾಲಿ ಹಣೆಯಿದುಯೇಕೆ ದೃಷ್ಟಿ ಕೆಳಗಿಹುದೇಕೆ
ಬೋಳುಗುಡುತಿದೆಯಲ್ಲ ನಿನ್ನ ಕೊರಳು ||
ಸೋಲೆಂಬ ಭಾವವದು ನಿನ್ನ ಕಾಡಿಹುದೇನು ?
ಗೆಲ್ಲುವೆನು ನಾನೆಂದು ತಿರುಗಿ ಮರಳು || ೩ ||

ಕೊರಳಲ್ಲಿ ಸರವಿರಿಸು ಹಣೆಗೊಂದು ಬೊಟ್ಟನಿಡು
ಜರತಾರಿ ದಿರಿಸೊಡತಿ ಚಂದ ಬಾಲೆ ||
ಧರಿಸೊಂದು ನಗುವನ್ನು ಪುಟ್ಟ ತುಟಿಗಳ ಮೇಲೆ
ಇರಿಸು ದೃಷ್ಟಿಯ ಚುಕ್ಕಿ ಕೆನ್ನೆ ಮೇಲೆ || ೪ ||

- ಸುರೇಖಾ ಭೀಮಗುಳಿ
19/12/2017
ಚಿತ್ರ : ಅಂತರ್ಜಾಲ