ಮೆತ್ತನೆಯ ಹಾಸಿಗೆಯು ನನ್ನನ್ನು ಸೆಳೆಯುವುದು
ಹತ್ತಿಯಾ ದಿಂಬೆನ್ನ ಹಿಡಿದೆಳೆವುದು ||
ಮುತ್ತುವುದು ನನ್ನನ್ನು ಸವಿನಿದ್ದೆಯಾ ಜೋಂಪು
ಕತ್ತಲೆಯ ಮುಂಜಾವು ಏಳಬಿಡದು || ೧ ||
ಸದ್ದಿಲ್ಲದೆನ್ನ ಮನ ಪ್ರಶ್ನೆಯನ್ನೆಸೆಯುವುದು
’ಎದ್ದೇನು ಸಾಧಿಸುವೆ ?’ ಎಂದೆನುವುದು ||
ನಿದ್ದೆ ಸುಖದಾ ಮುಂದೆ ಜಗವೆ ತೃಣವೆನಿಸುವುದು
ಬಿದ್ದು ಒರಗುವ ಆಸೆ ಚಿಗುರೊಡೆವುದು || ೨ ||
ಮಾಗಿಚಳಿ ಮಧುರತೆಗೆ ಮನ ಸೋಲದಿರಬೇಕೆ ?
ತೂಗುತಿಹ ಮನಸನ್ನು ಹದಕೆ ತರಬೇಕೆ ? ||
ಬೇಗೆದ್ದು ಕೆಲಸದಲಿ ತೊಡಗಿಕೊಳ್ಳಲೆ ಬೇಕೆ ?
ಸೊಗಸಾದ ಸವಿನಿದ್ದೆ ಕಳೆದುಕೊಳಬೇಕೆ ? || ೩ ||
- ಸುರೇಖಾ ಭೀಮಗುಳಿ
16/01/2017
ಚಿತ್ರ : ಅಂತರ್ಜಾಲ
